Takimi me Sinan Hoxhën është i vështirë deri në momentin që përballesh me të. Të duhet të bësh një telefonatë, e ke në Kosovë. Më pas një tjetër telefonatë, sërish në Kosovë. Në fund, kur vijon të këmbëngulësh, merr një përgjigje gjithë buzëqeshje: “Akoma s’u dorëzove?”.

Në momentin e takimit mund të ndihesh e qetë, pasi e qeshura e tij është ngjitëse. “Se mos m’i transformon fjalët që them e na dalin pastaj lloj-lloj iderash”, shprehet buzagaz, duke thumbuar kështu lajmet që bënë bujë për të në mediat e përditshme. E pastaj, si për t’iu përgjigjur vetë atij thumbi, vijon: “Megjithëse i falënderoj të gjithë ata që shkruajnë. Fundja në momentin që shkruajnë, thjesht tregojnë që jam i rëndësishëm e kjo më bën të ndihem mirë”.

Skena për të është gjithçka. Nuk ngurron të rrëfejë që nga ëndrrat e fëmijërisë e deri në atë që ndoshta edhe nuk del, “të ulet në Hënë”. Thotë se është zemërgjerë dhe është e vështirë të mërzitet. I pëlqen të jetën në qendër të vëmendjes, pavarësisht se kjo nënkupton që nuk është i lirë në gjithçka. Më poshtë një rrëfim i plotë i Sinan Hoxhës.

Sinan, duket se karriera juaj është në ditët e saj më të mira. Kujt ia dedikoni gjithë këtë sukses?

Padyshim familjes time, punës dhe përkushtimit tim dhe në mënyrë të veçantë publikut, i cili është shumë i rëndësishëm për mua.

Jeni shumë aktiv edhe në Kosovë. Si ndiheni me publikun atje?

Jam më shumë aktiv në diasporë, por edhe në Kosovë. Publiku i shqiptarëve në diasporë ka një kulturë të ndryshme nga publiku këtu, të të dëgjuarit muzikë “live” në diskoteka, ndërsa këtu është më shumë karaoke dhe “playback”. Kjo është çështje e menaxhimit.

Kishit një konflikt me policinë serbe, për shkak të xhaketës me shqiponjën dykrenare…

E kam të ndaluar të flas për këtë çështje nga avokati, sepse jam në gjyq.

Para pak kohësh nxorët në tregun muzikor një këngë të re me Seldin dhe Medën, e cila rezultoi shumë e suksesshme. Cilat janë planet tuaja më të afërta?

Përveç koncerteve në fillim të verës, do të realizoj një këngë të re dhe videoklip. Do të jetë një këngë solo pas shumë bashkëpunimeve që kam realizuar. Mendoj se është një këngë shumë e mirë, por do të jetë publiku që do ta vlerësojë. Klipi do të jetë ndryshe nga të gjitha klipet që kam realizuar. Seç kam një energji të paparë për të punuar (qesh).

Gjithë kohës në lëvizje. Ndiheni ndonjëherë i lodhur?

Është e lodhshme të udhëtosh me çanta nga një aeroport në tjetrin, nga një hotel në tjetrin, nga një shtet në tjetrin, nga një qytet në tjetrin… por gjithçka shpërblehet kur shoh që salla ku do të këndoj është plot, duartrokitjet e publikut dhe kështu kënaqësia e mund lodhjen.

Me cilët këngëtarë ju pëlqen të bashkëpunoni?

Kam kënduar me disa këngëtarë të njohur dhe të sukseshëm, por ëndrra ime është këndoj me legjendën mbarëshqiptare Sabri Fejzullahun, të cilin e kam si baba të dytë. Nuk i vjen më kombit një artist si ai, ka aftësi të jashtëzakonshme njerëzore edhe artistike. Është e vetmja dëshirë e imja.

Sa kohë qëndroni përpara pasqyrës?

Në jetën e përditshme aspak, para koncertit më shumë seç duhet. Sepse e vlerësoj publikun që kam përballë.

Shpenzoni shumë për veshjen?

Jo. Rrobat gjithmonë i blej në Tiranë pavarësisht se udhëtoj shumë. Rrobat që përdor në jetën e përditshme janë të thjeshta dhe të blera lirë, ndërsa në skenë rrobat që përdor janë të kushtueshme, kryesisht kostume klasike.

Vazhdimisht synoni të ndiheni mirë apo të dukeni mirë?

Dua të ndihem mirë, por është e rëndësishme që para publikut edhe të dukem mirë. Të ndihem mirë me veten dhe të tjerët të ndihen mirë me mua.

Cili është personi më i rëndësishëm për ju?

Nëna ime. Nuk e zëvendësoj me asnjë.

Çfarë vendi zë familja në jetën tënde?

Nëse familja ime nuk është mirë, as unë nuk jam mirë. Kam një marrëdhënie shumë të mirë me familjen. Kërkoj ndjesë për modestinë, por do të dëshiroja që siç e kam unë marrëdhënien time me familjen ta kishte çdo shqiptar.

Keni deklaruar se në vitin 2012 do të martoheni…

Dua të ndodhë një gjë e tillë, e dëshiroj me gjithë zemër, por të shohim…

Do të krijoni një familje të madhe?

Do të jetë një familje e madhe numerike. I dua shumë fëmijët dhe dua të kem shumë fëmijë. Por këtë e ka dorë Zoti dhe gruaja ime e ardhshme (qesh)

Çfarë bën kur je shumë i mërzitur?

Ndodh shumë rrallë, aq rrallë sa nuk e di çfarë bëj.

Cilit personi i rrëfeni gjithçka?

Nëna ime.

Çfarë nuk fal Sinani?

Hipokrizinë, mosmirënjohjen, xhelozinë e tepruar, pabesinë, tradhtinë.

Çfarë të bën të ndihesh keq?

Kur shoh njerëz që nuk kanë lekë të hanë bukë, fëmijë të sëmurë, qeveritarët që nuk kujdesen për nevojat e qytetarëve. Edhe të pabesët më bëjnë të ndihem keq.

E gjeni kohën për veten?

Shumë pak kohë dhe kjo më ka bërë që edhe të anashkaloj martesën.

Çfarë ju pëlqen të bëni në kohën e lirë përveç muzikës?

Më pëlqen hipizmi, është një ndër pasionet e mia.

Si është dita e Sinanit kur nuk ka asnjë koncert…

Hahahahaha… Mos ndill ters! Por ndodh shumë rrallë. Pa skenën do të vdisja. Asgjë nuk i zëvendëson emocionet e saj.

Cili është kujtimi më i bukur?

Dalja për herë të parë në skenë në Pallatin e Kongreseve, isha i vogël. Nuk do ta harroj kurrë atë moment.

Ju pëlqejnë kafshët?

Po, më pëlqejnë shumë.

Cila është kafsha për të cilën do të donit të kujdeseshit?

Kali. Kam pasur një kalë për të cilin kujdesesha, por që tani nuk e kam më dhe më mungon. Do doja të blija një kalë.

Kur ishit fëmijë, cila ishte loja e preferuar?

Me peta dhe kopaca, megjithëse edhe këto nuk i kam shijuar aq sa do të doja, sepse fëmijëria ime ishte e shkurtër. Kam filluar të punoj shumë herët, kur isha shumë i vogël. Jam rritur dhe pjekur para kohe dhe dikur nuk më ka pëlqyer kjo gjë, por tani e vlerësoj këtë fakt, sepse kam arritur të di vlerat e punës dhe përgjegjësitë e mia.

Nëse do të mund ta ndaloje kohën, kur do ta ndaloje?

Nuk e di. Sepse për një artist atëherë kur ai mendon se ka arritur majat, fillon rënia. Artisti kërkon gjithmonë më shumë. Kohën nuk do ta ndaloja, por do të doja të isha edhe një herë 20 vjeç.

Libri më i bukur që keni lexuar…

“Gjuetari i Balonave”

Do të donit të ishit politikan?

Jo, kurrë! Nuk më pëlqen, sepse thonë që politika është … unë nuk jam… dhe nuk më pëlqejnë njerëzit… (qesh me mungesat e fjalëve)

Ëndrra më e bukur që keni parë?

Pashë ëndërr sikur fluturoja dhe u ula në Hënë! Bën vaki edhe s’dalin (qesh)

Çfarë do t’u thoni atyre që ju kanë lënduar?

Asgjë. Në Kuran, thuhet: çfarëdo që të bësh në dynja, të kthehet mbrapsht. Zoti vonon, por nuk harron. Nuk do të lëndoj askënd edhe nëse më lëndon.

Si do ta përkufizoje veten me një fjalë?

Zemërgjerë.

Ku do të jeni më 14 shkurt?

Për Shën Valentin do të jem në Prishtinë në një diskotekë, ndërsa për pavarësinë e Kosovës do të jem në Zvicër.

Do të bëni dhuratë për Shën Valentin?

Jo, nuk do të bëj. Do doja shumë, por për momentin nuk kam kujt t’i bëj. Por kjo s’do të thotë që nuk pres dhurata (qesh).

U fol gjatë për një lidhje tuajën me Seldin. Si është e vërteta?

Nuk ka asgjë të vërtetë. E kam thënë, rithënë dhe do vazhdoj ta them. Shpifjet kanë arritur kulmin për mua. Me Seldin kemi lidhje gjaku, kjo është e vetmja e vërtetë.

Si janë marrëdhëniet tuaja?

Shumë të mira. Është njeri i mrekullueshëm dhe këngëtar i talentuar.

U përfol një zënkë mes jush…

Jo. Nuk është e vërtetë. Kemi pasur disa koncerte në vende të ndryshme, dhe jo bashkë. Kjo është normale, sepse në koncerte nuk ftohen gjithmonë dy këngëtarë. Është çështje menaxhimi.

Albina Hoxha Gazeta Shekulli

Së fundmi Sinan Hoxha duket se i ka vendosur vetes detyrë që sivjet të gjejë me patjetër vajzën e duhur, prandaj edhe e kemi parë kaq shpesh krah vajzave të bukura, por duket se ende ndihet në dilemë së cilën duhet të zgjedhë.

Sigurisht për një artist të njohur si Sinani nuk është e lehtë të bëjë zgjedhjen e duhur kaq shpejt, e për më tepër duke rendur “lule më lule”, dilemma bëhet akoma më e madhe.

Shpresojmë që edhe Sinani t’ja bëmë “Bam” sivjet, sigurisht pasi të ketë gjetur vajzën ideale.

Sinan Hoxha  ka treguar se viti që lamë pas ka qenë pak i ekzagjeruar me lajmet rozë për të, ndërsa ai nuk ka dashur të flasë për ngjarjen që i ka ndodhur në Preshevë, që u fol që ai u arrestua nga policia serbe, pasi këngëtari ia ka lënë këtë proces vetëm gjykatës e nuk ka të drejtë të flasë.

Por, edhe thashethemet se ai tashmë nuk bashkëpunon me Seldin i ka hedhur poshtë, duke thënë se nuk është gjithmonë që ata duhet të jenë bashkë nëpër koncerte. Por, në rrëfimin e tij ne programin “Pro Shqip” në Top Kosova Radio këngëtari i njohur, Sinan Hoxha, ka treguar një sekret dhe një qëllim që i ka vënë vetës për 2012, ai do të martohet.

Pas publikimit të këngës për bashkimin kombëtar nën titullin “Kuq e Zi” në bashkëpunim me kolegët Meda e Seldi, e cila duhet thënë se ka arritur një rekord klikimesh (mbi 1 milion e gjysmë) edhe pse ka vetëm pak ditë që është publikuar, këngëtarit nuk i kanë munguar ofertat për koncerte nga të katër anët e globit.

Shumë të tilla i kanë ardhur atij edhe nga Presheva, e cila përmendet disa herë në tekstin e këngës. E pikërisht gjatë një koncerti të mbajtur në Preshevë, ku ka pasur një pritje madhështore, ose më saktë gjatë rrugës së kthimit, Sinan Hoxha është konfliktuar me autoritetet serbe, të cilat i kanë kërkuar të heqë menjëherë xhaketën, mbi të cilën është qëndisur shqiponja dykrenare.

Këtë xhaketë Hoxha e ka veshur edhe në xhirimet e videoklipit tej e tej Shqipërisë. Ofendimeve të palës serbe për simbolet tona kombëtare, Sinan Hoxha u është përgjigjur me të njëjtën monedhë, duke i fyer gjithashtu ata dhe siç mësohet mes të tjerash, i ka thënë “Fuck Serbia”, ama kjo gjë i ka kushtuar jo pak.

Tetë orë të mira në qelitë e paraburgimit, derisa organet shqiptare kanë ndërhyrë për lirimin e tij. Ndonëse na vjen keq për këtë ndodhi, ndihemi mirë kur mësojmë që Sinani s’ka lejuar përdhosjen e simboleve tona kombëtare, të cilat duhet thënë që janë të ndaluara të ekspozohen në Preshevë.

Bluetooth

Ata mund të krenohen, por pa dyshim kënga “Kuq e zi” e Medës, Seldi dhe Sinanit ishte më e keqja për vitin 2011.

Kjo këngë mund të klikohet, por ajo nuk është as këngë tallava as këngë me motive folklorike e as këngë patriotike.

Ku me ditë çfarë kënge është. Çfarë zhanri e dinë vetë autorët e këngës. E për vlera, të gjithë e dimë çfarë vlerash përcjellin të tre këngëtarët.

Express

Fansat nuk i imagjinojnë më të ndarë që pas famës që morën si duet i suksesshëm me dy klipet e tyre të fundit, “Adrenalina” dhe “Biondina”. Duke iu referuar impaktit në duet të Sinan Hoxhës dhe Seldi Qalliut, dalja në skenë e Seldit i vetëm në “Kënga Magjike 2011” u shoqërua me komente të tipit: “Seldi ‘tradhton’ Sinanin, pra këndon i vetëm kësaj here”.

Por ndërsa Seldi i rikthehet për herë të tretë konkurrimit te “Kënga Magjike”, me një krijim plot atmosferë të shkruar nga Elgit Doda, nga disa është komentuar thjesht një test artistik, apo një truk për të parë reagimet e publikut, ndërsa jemi mësuar t’i shohim gjithmonë bashkë dy këngëtarët së fundi. I pyetur nga gazeta “ Panorama” se përse vendosi të këndojë i vetëm në “Kënga Magjike”, Seldi pohon se “Arsyeja është vetëm se Sinani është i profilizuar në gjininë e tij muzikore, dhe s’mund të konkurrojë në një festival si “Kënga Magjike”. Nga ana tjetër, mediat e kanë komentuar Seldin si djaloshi i cili u bë i njohur në “Big Brother”, dhe që më pas i ndodhi të ishte super i përfolur me historinë e mediatizuar dhe këngët luksoze me Sinan Hoxhën, por që tashmë prek i vetëm skenën e festivalit “Kënga Magjike” dhe nuk dihet pse. Në komentet mediatike pas lançimit të këngës së tij të dielën e kaluar në programin “E diela shqiptare” në “Tv Klan”, thuhet se këngëtari Seldi Qalliu këtë herë e ka “tradhtuar” Sinan Hoxhën, duke realizuar këtë këngë solo. Ai është pranuar në këtë festival për të kënduar një këngë me titull “Kno”, që ishte natyrisht krijim plot ritëm, ashtu siç është profilizuar Seldi të shfaqet në të gjitha këngët e tij solo. Seldi ka sqaruar gjithashtu se “Tashmë dihet suksesi ynë në duet me dy këngët “Adrenalina” e “Biondina”, dhe për këtë arsye ne do vazhdojmë të këndojmë bashkë. Sapo kemi realizuar klipin tonë të ri, që do të jetë goditja jonë më e fortë në tregun muzikor e kësaj here kënga nuk i dedikohet jo ndonjë zeshkaneje apo biondeje, por titullohet “Kuq e zi” dhe do të karakterizohet nga nota të forta patriotike. Bashkë me ta, në klipin e ri që do të lançohet për festën e 28 Nëntorit, këndon dhe këngëtari shumë i paguar në Kosovë e diasporë, Meda.

Rozana Radi dhe Sinan Hoxha janë protagonistë të fotove të reja të nxehta që ka publikuar e përditshmja “Panorama”. Gazeta ka vendosur të nxjerrë fotot pas një deklarate të bërë në një emision televiziv nga Radi e cila ka pretenduar se fotot e publikuara nga kjo gazetë pesë muaj më parë nuk ishin të vërteta por montazh.

“Jemi të detyruar t’i kthehemi, dhe kësaj radhe të bëjmë publike edhe fytyrat e Sinan Hoxhës, Seldi Qalliut dhe Valbona Memës, sepse Rozana u kujtua gati pas pesë muajsh të na akuzojë se fotot nuk qenkan të vërteta, por montazhe.

Ne, qëkur i kemi publikuar këto foto, kemi vënë shënimin se, nëse personazhi ka pretendime për autenticitetin e fotove, është i lirë të vijë në redaksi për t’i kontrolluar ato” thuhet në lajmin e publikuar nga gazeta.

Në fakt “Biondina e tyre” i bëri edhe këtë verë ata të dy shumë të pasur. Sinani dhe Seldi tashmë kudo janë bashkë dhe hiti i tyre, megjithëse u quajt i vjedhur, po dëgjohet kudo, sidomos në plazhet shqiptare.

Kjo është fama që ata marrin, pavarësisht se fjalët për ata të dy dhe lidhjen e tyre ende nuk kanë përfunduar. Vetë ata nuk u deklaruan për paratë e fituara gjatë këtij sezoni veror, por thonë se e kanë kapur tregun edhe këtë vit.

Pas shumave të mëdha të fituara gjatë dimrit me klipin “Adrenalina”, Sinan Hoxha dhe Seldi Qalliu kanë menduar të realizojnë një tjetër klip së bashku me titull “Bjondina”. Klipi i realizuar me figurantë, modelët e zgjedhur të “Joni Peçi fashion group” dhe i realizuar nga “Max Production”, nis transmetimin sot në të gjitha kanalet muzikore.

Sinani i pyetur nga “Panorama” për veçantinë e duetit Sinani-Seldi në këtë klip u përgjigj se kësaj here kanë menduar t’u dedikojmë një këngë vajzave bionde, ndryshe nga kënga “Adrenalina”, që u dedikohej zeshkaneve. “Arsyeja”, thotë Sinani, “pasi në koncertet tona ishin të pranishme shumë fanse bionde, të cilat na e kërkuan në një farë mënyre një dedikim të tillë për to”. Realizimi i klipit të këngës, me vargje të Armand Trebickës, ka kushtuar më shumë se 10 mijë euro, e njëjta shumë e shpenzuar nga këngëtarët për këngën “Adrenalina”. Për disa mund të tingëllojë e tepërt kjo shumë, ndërsa për Sinanin dhe Seldin është një shumë parash normale për një klip të realizuar me cilësi, nisur nga fakti se sezoni që kaloi ka qenë shumë i mbarë për ta, ndërsa nga menaxherët e lokaleve ku kanë kënduar janë deklaruar shuma të mëdha që u ofrohen atyre për koncerte.

Për këtë verë ata sapo kanë mbyllur një kontratë për 60 netë koncerte në gjithë plazhet e Shqipërisë dhe Diasporë, përveç Tiranës. Këngëtarët nuk kanë përmendur shifër konkrete se sa janë paguar për këto koncerte, por nuk e kanë fshehur që bëhet fjalë për një shumë marramendëse. Aq shumë është rritur popullariteti i tyre në duet sa në një tur koncertesh që dhanë në Australi u pritën nga qindra fansa, të cilët u kishin rezervuar dhe udhëtime me limuzina e pankarta në duar.

Nuk dihet se sa do të pëlqehet kënga “Biondina” ndërkohë që kënga “Adrenalina” e publikuar në ndërrimin e viteve 2010-2011, vetëm në 2 muaj pasi u hodh në youtube arriti të regjistronte 3 milionë e 200 mijë klikime, duke u klasifikuar deri tani si kënga më e klikuar shqiptare në internet. Panorama

Dyshja Sinan Hoxha dhe Seldi Qalliu kanë rrëzuar nga froni këngëtaren Aurela Gaçe, e cila deri më tani kishte videon më të shikuar në Youtube, sa i takon muzikës shqiptare. Këngët e tyre përkatëse që kanë “garuar” me njëra-tjetrën janë “Adrenalina” dhe “Origjinale”, me të cilën Aurela u përfaqësua denjësisht në “Balkanika Awards” pak javë më parë.

Po t’u referohemi statistikave të nxjerra nga Youtube, që prej publikimit të “Adrenalinës” rreth gjashtë muaj më parë, dyshja Sinan – Seldi, të cilët së bashku kanë arritur të bëjnë koncerte deri në Australi; kanë arritur të mbledhin 5.156.122 klikime, ndërkohë që “Origjinale” ka saktësisht 5.511.866, klikime. Por, duke marrë parasysh se hiti i këngëtares labe që pret fëmijën e saj të parë, është lançuar në treg një vit më parë, diferenca nuk është e madhe. Kështu pra, fansat e Seldit dhe Sinanit me shumë siguri do ta tejkalojnë “Origjinalen” e Aurelës, duke e nxjerrë shumë shpejt atë në vendin e dytë të klasifikimit të këngëve më të votuara shqiptare.

Pasi ka nxjerrë një këngë të re të shoqëruar me klip, ashtu siç bën çdo fillim vere, këngëtarja Ingrid Gjoni mesa duket po mendon seriozisht edhe për argëtimin e saj. Fundjavën e kaluar menjëherë pas pjesmarrjes në natën përmbyllëse të këtij sezoni të “Zonë e lirë” ka kaluar orët e para të mëngjesit tek kompleksi “Mai Tai” në kryeqytet.

Së bashku me Ingridin ishte edhe mbesa e saj balerinë e cila me siguri ndjehet me fat sepse nuk ndodh shpesh të dalësh me teze për jetë nate. Vajzat janë parë në shoqërinë e Sinan Hoxhës dhe Seldit të cilët tashmë kanë unifikurar axhendat dhe po bëjnë koncerte bashkë. Të katërt janë argëtuar deri në orët e para të mëngjesit. PanoramaPlus

Këngëtarja Rezarta Shkurta e cila do të përballet së shpejti me togat e zeza, do të ketë në disfavorin e saj edhe deklarimet e dy kolegëve të tjerë, Sinan Hoxhës dhe Valbona Memës. Dëshmitë e dy këngëtarëve janë bashkangjitur në fashikullin e dosjes hetimore që i është përcjellë gjykatës për shqyrtim.

Ndërkaq, prova më e fortë ku është bazuar prokuroria për të ngritur akuzën ndaj Rezarta Shkurtës, atë të dëmtimit fizik në dëm të këngëtares Rozana Radi, është ekspertimi mjeko-ligjor. Burime pranë Prokurorisë së Tiranës, pohuan sot se, ka përfunduar hetimi ndaj këngëtares që u mor e pandehur në fund të muajit të kaluar për veprën penale të “dëmtimeve të tjera” me dashje. Nga të njëjtat burime mësohet se gjatë dhënies së deklarimeve në cilësinë e personit që ka dijeni mbi ngjarjen, dy këngëtarët Sinan Hoxha dhe Valbona Mema kanë pohuar se kishin vërejtur shenja të zeza e dëmtime në fytyrën e Rozanës.

Ata kanë shpjeguar se kanë shkuar për vizitë tek shtëpia e Radit, dhe kur e kanë parë që në fytyrën e saj gjendeshin shenja të zeza, e kanë pyetur se çfarë kishte ndodhur. Mema dhe Hoxha kanë shpjeguar para prokurorit të çështjes, Ervin Karanxha se shenjat e dhunës ishin evidente. Nga ana tjetër mësohet se dëshmitë e tyre lidhur me vendndodhjen e shenjave të zeza në fytyrën e Radit, kanë qenë të e përputhura edhe me përcaktimin e bërë në ekspertimin mjeko-ligjor. Sipas këtij ekspertimi, Radi rezultonte të ishte e paaftë për punë për më shumë se nëntë ditë për shkak të dëmeve fizike të marra nga goditjet me grushte e shkelma prej këngëtares Rezarta Shkurta.

Në cilësinë e dëshmitarit i janë marrë deklarimet edhe bashkëshortit të Shkurtës, nipit të ish-diktatorit Enver Hoxha, Ermalit.

Nga burimet e prokurorisë mësohet se ky i fundit është shprehur se ka qenë Rozana Radi ajo që ka kërkuar takimin dhe ka filluar sherrin. Sherri mes dy këngëtarëve lindi në një reality show në Kosovë dhe më pas përfundoi në sherr, ku Rezarta akuzohet se e ka goditur me grushte e shkelma Rozanën. NOA

Sikundër të gjithë, edhe Sinan Hoxha e ka një fobi…Këngëtari i dhjetëra hiteve në muzikën shqiptare, i ka tmerr avionët, por megjithatë i duhet që çdo javë të fluturojë me to si pasojë e koncerteve të shumta që ka në diasporë.

Fragmenti që sjell këtë herë në “Bluetooth” është shkëputur nga fundjava e shkuar, kur këngëtari Hoxha udhëtoi drejt Gjermanisë. I stresuar nga turbulencat që po pësonte avioni me të cilin po udhëtonte, Sinani nuk ka duruar dhe ka ndezur një cigare, konsumimi i cilës i ka kushtuar 1000 euro gjobë për shkeljen e rregullave. Ndonëse gjoba ka qenë shumë e kripur, Sinani e ka paguar pa bërë llafe, pasi përveçse u çlirua nga koncerti në të cilin ishte i ftuar, do t’i siguronte jo pak të ardhura. Bluetooth

I kritikuar për huazime muzikore, i snobuar nga “njohësit e artit të vërtetë”, Sinan Hoxha është një nga këngëtarët më të kërkuar shqiptarë që ka ditur me mjeshtëri të dominojë tregun muzikor dhe ta shndërrojë zërin e tij në një instrument financiar të suksesshëm.

15 vjet muzikë, 8 albume, mbi 20 videoklipe, katër koncerte recitalë e dhjetëra të tjerë muzika e tij sot është një industri. Më i kërkuari por edhe këngëtari më i diskutueshëm.

Në një intervistë për revistën ‘Shqip’ ai zbulon çelësin e suksesit të tij, lidhjen me publikun si dhe rrëfen se çfarë mendon për muzikën dhe këngëtarët e tjerë.

Është shumë e vështirë ta takosh Sinan Hoxhën. Jo për shkak të tipit por për impenjimet e shumta muzikore. Ka nxjerrë në treg albumin e tij “Xhelozia” dhe nuk rresht së kënduari nga një qytet europian te tjetri.

Një makinë e gjallë mund të quhet, për faktin se këndon live i shoqëruar nga orkestra e tij në shumicën e performancave. Dhe është pikërisht ky aktivitet shumë i ngjeshur dhe i kënduari jo me ‘playback’ siç bëjnë pjesa dërrmuese e këngëtarëve, që e bën atë të veçantë dhe të suksesshëm, por edhe këngëtarin shqiptar që fiton më shumë.

Ndryshe nga sa ndeshim shpesh që këngëtarët për të rregulluar jetën e tyre lidhen me politikën apo zënë ndonjë zyrë nëpër institucione shtetërore, Sinani ka ditur me zgjuarsi të kuptojë shijet e publikut, të depërtojë në to, të frymëzohet prej tij e padyshim ta kënaqë atë.

Shumë ekspertë të artit nuk e kanë marrë për vite në konsideratë e disa vazhdojnë ende. Ndoshta dhe për faktin se i ardhur nga periferitë e kryeqytetit, pa mbështetje, me prindër fare të thjeshtë që nuk kishin lidhje me artin, pa licera dhe akademizma diti të pushtojë skenat kudo. Të këndojë në Koplik por edhe në Medisson Square Garden ku ka kënduar Michale Jackson.

Gjithnjë i qeshur, më një thjeshtësi dhe mirësi që rrallë e ndesh tek artistët shqiptarë, ai ka aftësinë të ta shndërrojë intervistën në një bisedë si prej miqsh të vjetër, mjeshtëri komunikimi që i ka ndikuar jo pak në arritjet e tij.

Cili është sekreti i suksesit tënd?

Nuk është ndonjë sekret i madh. Rruga që të çon drejt tij është padyshim një punë e madhe dhe këmbëngulëse dhe përpjekje të vazhdueshme pa u tërhequr nga zhgënjimet në momente të caktuara, por duke gjetur forca për të vazhduar sikur të mos kishte ndodhur gjë, përkundrazi me më shumë përkushtim.

Po a ka një çelës sekreti?

Natyrisht dhe mund të them që gjetja e tij përbën bazën e rezultatit. Çelësi është kompromisi. Jo në kuptimin e rëndom të kësaj fjale por e shprehur si një vendosje ekuilibri midis vetes tënde dhe publikut. Publiku është “gjykatësi” i artit dhe në mënyrë specifike i muzikës, ai që jep vulën përfundimtare dhe vendos për suksesin apo dështimin.

Për afro 15 vjet je këngëtari më i kërkuar nëpër koncerte. Si ke arritur?

Siç thashë dhe më sipër kam ditur të krijoj artistikisht dhe ta hedh në nota muzikore atë që kërkon publiku duke u përpjekur të gjej e të kuptoj se cilat janë shijet e tij. Arsyeja është sepse unë jam shumë i përshtatshëm për muzikën popullore që për ne shqiptarët është si ushqim i shpirtit.

Në fund të fundit jemi ballkanas e si të tillë trashëgimnia e traditës popullore është shumë e fortë për të mos thënë pjesë përbërëse e jetës sonë. Jemi një popull që këndon jo vetëm në festa por dhe në një darkë të thjeshtë, në punë, që fishkëllejmë melodi, që edhe vajin e kthejmë në këngë.

Të ndryshëm nga një krahinë në tjetër si lloje muzike. Kjo është dëshmi edhe e një shpirti ta madh artistik e të ndjeshëm që shqiptarët kanë. Dhe unë kam këtë fakt parasysh në këngët e mia. Në dallim me vendet e Europës ne nuk jemi, për fat të mirë, të shkëputur nga tradita jonë.

E ke kthyer me shumë aftësi muzikën në një biznes….

Epo kam investuar mbi veten time. Albume, videoklipe, koncerte recitalë këto kërkojnë shpenzime. Por përsëri është publiku ai që ta kthen nëse ti këtë gjë ke arritur ta realizosh mirë. Ka shumë që harxhojnë për të bërë një këngë dhe nuk arrijënë t’i marrin mbrapsh as shpenzimet.

Pastaj mos të harrojmë një fakt jo pak të rëndësishëm. Që unë në të gjitha koncertet e mia, por edhe atje ku marr pjesë për me pak këngë, këndoj gjithmonë live. Nuk këndoj në playback dhe publiku këtë gjë e vlerëson. Kur shikon se këndon katër orë për ta dhe jep dhe shpirtin të shpërblen. Duhet të ofrosh që dhe të marrësh. Spektatori nëse nuk këndon live nuk ka ndonjë interesim për këngën se ndryshe dëgjonte cd-në në shtëpi. Nuk duhet të fshihesh pas formës dhe veshjes, ato mund të tërheqin për momentin por nuk mbajnë gjatë. Si kudo edhe në këtë biznes qëndron rregulla e më të “fortit”.

Pse shumica e kolegëve të tu ankohen?

Në Shqipëri abuzohet me fjalën artist. Këndon një këngë në festival dhe nuk këndon më pas asgjë. Edhe pse kritika i vlerëson presin festivalin tjetër për të kënduar një këngë të re. Atëherë ky nuk është më një profesion por një hobi, e natyrisht që nuk ka sesi të të ftojnë nëpër koncerte e të të krijojnë të ardhura.

Po kur vjen puna te “live”?

Ëshë një kategori tjetër e gjerë e atyre që nuk rreshtin së prodhuari videoklipe, shumë prej tyre edhe të bukur dhe të kushtueshëm por janë shumë të pakët ata këngëtarë sot që lodhin fytin për të kënduar “live”, disa nga mungesa e dëshirës, të tjerë nga paaftësia. Shumica vetëm performojnë në skenë, tunden dhe luajnë belin por kjo vetëm i kënduar nuk është. Mbetet thjesht në kufijtë e një shfaqjeje. Asgjë më shumë.

Edhe ty të kanë krititkuar për këngë të huazuara…

Ka ndodhur sidomos në fillimet e mia dhe e kam sqaruar edhe në shumë intervista të tjera. Duhet të këndoja shumë dhe nuk kishte kompozime të mjaftueshme dhe të kënaqshme. Ndaj dhe kam sjellë në versionin shqip hite të vendeve fqinjë, por që publiku i ka pritur majft mirë. Duhet kuptuar edhe realiteti i asaj kohe. Dilnim nga një periudhë ku njerëzit kishin shumë etje për muzikë e veçanërisht për atë ballkanasen që nuk e kishin dëgjuar dot lirshëm. Kësaj shtoji dhe mundësitë e pakta financiare.

Por kjo ndodh edhe me këngëtarë të famshëm si Bocelli që këto javë nxorri në treg “Xhingëll bells” dhe u bë hit në tërë botën, edhe pse është një këngë që e njohin fëmijët e gjithë botës prej dhjetëra vitesh…

Po. Po. Rastet janë të shumta në botë. Dhe “O sole mio” e Domenico Modugno është kënduar në shumë gjuhë dhe më shumë sukses por asnjë nuk e vuri në diskutim pse morën këngën e tij. Kjo ndodh në Shqipëri, edhe pse unë nuk kam patur kurrë pretendimin se ato kanë qenë këngë të mia origjinale.

Vjen nga xhelozia?

Xhelozia ka pjesën e saj e sidomos në muzikë ku rivaliteti është i fortë kjo ndihet shumë. E natyrisht vjen se unë jam shumë i kërkuar se të ishte ndryshe nuk do të ishin marrë me mua. Më i kërkuari por edhe më i diskutuari. Sidoqoftë, këto vitet e fundit unë kam kënduar vetëm kompozime shqiptare të zhanrit popullor dhe balada të ndryshme.

Ndryshim i kushtëzuar?

Nuk do të thoja i kushtëzuar sesa i përshtatur. Kanë ndryshuar kohët, muzika ka evoluar, kanë evoluar dhe janë sofistikuar edhe shijet e publikut. Publiku është “aparati matës”. Por edhe unë jam pjekur artistikisht. Eksperienca dhe kontakti me njerëzit më kanë mësuar sesi t’i përshtatem atyre më së mirë, të perceptoj dëshirat e tyre e në këtë mënyrë të arrij të mbush sallat e koncerteve e të shes disqet me këngët e mia.

Kë do të falënderoje për punën tënde?

Përveç kompozitorëve ku dua të veçoj Alban Furtunën, me të cilin u bënë shumë vite që bashkëpunoj kam patur fatin të kem ndërtuar një orkestër timen me të cilën performoj në shumicën e koncerteve. Orkestra ka një rëndësi të madhe në përcjelljen e emocioneve te publiku e për pasojë në suksesin tim.

Si e menaxhon një axhendë kaq të ngjeshur?

Vetë. Kolegët më vënë në dukje se jam një menaxher i mirë dhe si tregon rezultati, ai financiar, di ta bëj këtë gjë. Ka raste që vihesh në vështirësi se duhet të zgjedhësh ku të shkosh, kur ke më shumë se një ofertë për të njëjtën periudhë. Udhëtoj shumë e duke qenë se shumica e koncerteve organizohen sipas mundësive që agjencitë kanë, e kam fjalën për në Europë, më duhet të lëviz nga një shtet te tjetri pa bërë pushim.

Kush të ndihmon për valixhen?

Edhe kur më ndihmon mamaja duhet t’i kontrolloj vetë sepse jam shumë i fiksuar pas gjërave të mia dhe dua të sigurohem mirë para se të nisem. Me duket sikur kam lënë gjithnjë diçka pa bërë.

Jeton vetëm?

Kam një shtëpi timen se tek shtëpia e prindërve nuk do të kisha qetësinë për të punuar, duke mënduar që kam shumë nipër e mbesa të vegjël të cilët duan vetëm të lozin e të merresh me ta. Por kjo nuk do të thotë që drekën mos ta ha çdo ditë me mamanë.

Kë veçon nga bashkëpunimet?

Nuk mund të veçoj asnjë. Kanë qenë të gjitha të shkëlqyera dhe rezultative, pra të goditura në shenjë. Kjo sepse kanë qenë më këngëtarë të shkëlqyer si Soni Malaj, Artjola Toska, Ermal Fejzullahu.

Kë veçon si bashkëpunim?

Quhet “Knoma këngën” me këngëtaren kosovare Shyrete Bejluli e cila ka një zë të mrekullueshëm. Ishte propozimi i saj. Muzika e teksti janë të Ilir Bezanit. Është një këngë e veçantë që ka një tekst prekës. Flet për dy pjesët e kombit tonë të ndara prej afro një shekulli që as muzikën e njëri tjetrit nuk na lejonin ta dëgjonim. Një baladë lirike që e kam shumë për zemër bazuar në folkun dhe në motivet e veriut ku mbizotëron lahuta dhe fyelli. Jam shumë i kënaqur nga kjo këngë.

E ndoqe Festivalin e Rtsh-së?

E ndoqa për të dëgjuar këngët. Kishte edhe këngë të mira. E vërteta është se nuk më pëlqen fakti që në garë mund të ketë edhe këngë të mira, e për shkak të klaneve artistike të mos kualifikohen për natën finale. Shpesh aty nuk vlerësohen këngët që e meritojnë e ndaj siç ndodh shpesh kritikohen e komentohen jo mirë nga mediat.

Pra mendon se ka prapaskena?

Sigurisht, dhe jo pak. Do isha naiv të thosha të kundërtën.

Ti vetë e kë menduar të marrësh pjesë në ndonjë festival?

Unë jam këngëtar i muzikës popullore dhe besoj se i tillë do të mbetem. Por edhe po të isha i asaj të lehtë nuk do të merrja pjesë kurrë. Përgjigjen e thashë pak më parë.

Shumë këngëtarë mbartin konflikte me njëri tjetrin. Ti si i ke raportet?

Përsa më përket mua shumë të mira. Nuk jam tip që krijoj konflikte. I shikoj si miq, përpiqem të krijoj marrëdhënie të mira me ta e sidomos korrekte. Korrektësia është kryesore për të patur një harmoni midis personave që ushtrojnë të njëjtin profesion. E natyrisht edhe respekti. Unë përpiqem t’i respektoj të gjithë pavarësisht vlerësimit artistik që mund të kem individualisht për ta.

Pas duetit “Adrenalina” këngëtarët Sinan Hoxha dhe Seldi Qalliu, duket që janë ndier vërtet të ekzaltuar në ditët në vazhdim, ndërsa janë fotografuar tek festojnë në prag të festave të fundvitit në një nga lokalet e njohur në Tiranë.

Pak ditë para se të niseshin për një koncert në Shtetet e Bashkuara të Amerikës, ata janë argëtuar në orët e vona me alkool, cigare dhe femra. Siç e shihni nga fotot, Sinani është fotografuar ndërsa shkëmben puthje të nxehta më një femër brune, që nuk dihet ende nëse e ka mikeshë, apo është njohur atë mbrëmje. Pas zhurmës rreth miqësisë së këngëtarëve ata vendosën të publikojnë klipin e tyre luksoz, duetin e parë artistik, ndërsa i drejtohen një femre zeshkane, duke mohuar që të jetë një person real. Klipi që kushtoi 10 mijë euro po transmetohet në të gjitha kanalet muzikore shqiptare. Vargjet e këngës u shkruan nga Rozana Radi, ndërsa muzika nga Alban Fortuna. E veçanta e këngës është një miksim i motiveve popullore dhe muzikës RnB, dy rrymat e lëvruara nga secili këngëtar në karrierën e tyre muzikore. Edhe Seldi Qalliu, ish-banor i “Big Brother 3”, e ka hedhur poshtë idenë se këtë këngë ia ka kushtuar Domenikës, ish-të dashurës së tij.

Ai është shprehur për “Panorama Plus” se “jo vetëm që nuk ia kam dedikuar këngën asaj, por tashmë dhe emrin ia kishte harruar”. Ndërsa Sinani, gjatë një interviste ekskluzive dhënë gazetës “Panorama”, mohoi që kjo këngë t’i kushtohej një femre reale, siç ishte përfolur se mund të bëhej fjalë për ish-të dashurën e Seldit, Domenikën. Por nga ana tjetër, ai nuk mohoi që ideja për këtë bashkëpunim u lindi nga vëmendja publike që morën të dy, pas deklaratës së Domenikës, e cila pohoi se mes tyre nuk ekzistonte thjesht një miqësi.