Presidenti i Republikës, Bamir Topi, ka dekoruar sot me Urdherin “Mjeshtër i Madh” balerinin Kledi Kadiu, një nga balerinët shqiptar më të njohur jashtë vendit.

Kadiu është dekoruar me motivacionin e balerinit të talentuar, të edukuar në shkollën shqiptare të artit, që me interpretimin e tij mjeshtëror është bërë një ndër artistët më në zë në Itali, duke luajtur një rol të rëndësishëm në ngritjen e imazhit të Shqipërisë jashtë vendit.

Kledi Kadiu punon dhe jeton prej disa vitesh në Itali. Ai e filloi karrierën e tij në vitin ’91 në Teatrin e Operës dhe Baletit dhe në vitin 1993 bëhet balerin i parë. Në vitet e mëvonshme emigron në Itali dhe në vitet ’97-’98 kërcen me Shoqërinë e Teatrit Filarmonik të Veronës. Bie shpejt ne sy të ekspertëve e kritikëve të artit qe vlerësojnë talentin, forcën dhe thjeshtësinë e tij, si në baletin klasik, ashtu edhe në atë modern. Në 1998 fillon te marre pjese ne programe te ndryshme televizive.

Përveçse një karriere të rëndësishme si në teatër, ashtu edhe në televizion, ai ka marrë pjesë e ka koreografuar shumë veprimtari të dëgjuara.
(ma.ar/BalkanWeb)

Një histori e pakëndshme ka ndodhur në Itali mes balerinit shqiptar Kledi Kadiu dhe një kompanie që kishte komunikuar me të për ta pasur si imazh në lançimin e një “club”-i gej në Abruzo.

Balerini shqiptar ishte ftuar të merrte pjesë në natën e hapjes së sezonit të “4 DOR”, që është praktikisht një ambient shumë i frekuentuar për jetën e natës, më së shumti nga komuniteti LGBT në rajonin Pescara.

Hapja e sezonit dimëror në këtë lokal do të zhvillohej në datën 19 nëntor dhe organizatorët, pasi kishin vendosur kontaktet e nevojshme me menaxherin e balerinit, publikuan edhe një poster që njoftonte praninë në atë ambient të simbol-seksit shqiptar.

Por gjithçka duket se shkoi shumë keq, qoftë për Kadiun, qoftë për menaxherët e “4 DOR”! Pasi panë në rrjetet e shumta sociale në internet posterin që njoftonte praninë e Kadiut në një lokal nate që fton sidomos komunitetin gej, shumë djem edhe vajza të këtij komuniteti nisën t’i shkruanin atij dhe ta përgëzonin për faktin që me pjesëmarrjen e tij në atë ambient po inkurajonte lëvizjen për të drejtat LGBT në Itali. Diçka e rrallë kjo për një shqiptar të njohur në botën e shoë-biz apo jo?

Mirëpo balerini, siç duket, kishte pranuar të ishte i pranishëm pa u informuar mirë më parë se për çfarë lloj audience bëhej fjalë.

Mes personave që i shkruan Kledit për ta inkurajuar për praninë e tij në lokalin në fjalë, ishte dhe një aktivist shqiptar për të drejtat e njeriut (i cili kërkon të mos identifikohet). Por, për çudinë e këtij aktivisti dhe bashkëkombasi shqiptar, përgjigjja e papritur e Kledit ishte: “Unë nuk e di se për çfarë bëhet fjalë! Nuk do të jem i pranishëm atje…”.

Më konkretisht, përgjigja e Kadiut ishte: “Të falenderoj për komplimentet, por unë nuk di gjë fare për këtë njoftim dhe nuk kam në mend të performoj asnjë sezon në lidhje me këtë klub që nuk kam asnjë lloj dijenie”… I njëjti aktivist kontaktoi më pas me kompaninë që organizon këtë event, e cila u gjend krejtësisht e papërgatitur për këtë situatë. Kledi do të vinte në lokal, do të performonte, do të jepte autografe e pastaj do të bënte fotografi me klientët”, tha Lidia Nasuti, një zëdhënëse dhe bashkorganizatore e këtij eventi.

Për të paktën tre ditë rresht menaxheri i balerinit mësohet se komunikoi me organizatorët e eventit në Pescara, derisa pjesëmarrja e balerinit shqiptar në hapjen e sezonit dimëror të lokalit më të madh edhe për homoseksualët në Pescara të Italisë, u anulua.

Që të dyja zyrat e shtypit tentuan të sqaronin situatën e të kërkonin ndjesë. Zëdhënësi i Kledi Kadiut u justifikua me faktin se në datën 19 nëntor, siç parashikohet promovimi i sezonit të ri, balerini shqiptar është i angazhuar në të tjera evente. Këtë justifikim Kledi Kadiu ia nis përmes zëdhënësit të vet agjencisë që organizon eventin në fjalë. “Kledi do të jetë i pranishëm në një event tjetër”.

Vetë kompania që menaxhon marrëdhënien me publikun të lokalit tashmë të famshëm në Pescara, në një njoftim për klientët nënvizon justifikimin zyrtar të Kadiut për mospjesëmarrjen e tij duke e shoqëruar me komentin se “ne nuk besojmë se angazhimi i Kadiut në një event tjetër është motivi i vërtetë pse ai nuk do të jetë në lokalin tonë në datën 19 nëntor…”.

Në të kundërtën, argumentojnë organizatorët e eventit gej në Pescara, Kledi nuk do të na kishte konfirmuar më parë pjesëmarrjen e tij, duke lënë të kuptojë se, sipas tyre, arsyeja e mospjesëmarrjes së balerinit ka të bëjë me faktin se balerini shqiptar u tremb që e gjithë kjo histori u mor vesh në Shqipëri, qoftë nga komuniteti LGBT, e sidomos nga media…

Në fund të fundit, është dukshëm egoist veprimi i balerinit, veprim që shkoqur dhe shqip mund të përkthehet kështu: Unë jam dakord, por mos u thuaj gjë shqiptarëve…! 

Nga  Kristi Pinderi Gazeta Shekulli

Kledi Kadiu dhe Anbeta Toromani kanë kërcyer së bashku “Vallen e napolonit”

Një valle tipike e  Shqipërisë së Mesme në emisionin e pasdites ”Pomeriggio Cinque”  në kanalin italian “Canale 5” që drejtohet nga Barbara D’Urso.

http://www.youtube.com/watch?v=i49385JnZI0

Për të është orari i drekës. Sapo ka mbaruar mësimin me studentët dhe ndërsa porosit për të ngrënë, zhvillon edhe këtë bisedë të këndshme me ne. Pak ditë më parë është kthyer nga një prej udhëtimeve më mbresëlënëse të tij. Një eksperiencë sa e dhimbshme, aq edhe e veçantë. Balerini i suksesshëm Kledi Kadiu, i zgjedhur Ambasador i UNICEF Italia, ka vizituar fëmijët e Bangladeshit. Përpos dëshmisë së jetës së tyre të vështirë, Kledi ka marrë prej tyre buzëqeshje dhe përqafime, që janë gjuha më universale në botë… Pas këtij misioni të rëndësishëm, Kledi ka vizituar edhe Tiranën, pak ditë më parë, për të realizuar një projekt të tij. Një emision, ku në qendër do të jenë pedagogët dhe balerinët shqiptarë, që kanë bërë histori në Europë. Program ky që do të transmetohet në çelje të edicionit të dytë “Step, passi di danza” në muajin shtator në Itali.

Por sot në këtë rrëfim, Kledi, djali i cili rreth një vit më parë na prezantoi “Jetën e tij, si një përrallë”, përmes të parit libër të tij, botuar nga shtëpia botuese “Dudaj”, në Tiranë… tregon për gjithë përvojat, që nga libri, ekrani e filmi… E ardhmja e tij?! Sigurisht, e pandashme nga baleti… Një lidhje serioze për të…? Eh… Kjo është histori e gjatë… Le të na e zbulojë ai vetë në këtë intervistë speciale, realizuar për gazetën “Mapo”!

Kledi, si do ta përshkruanit këtë fazë të jetës suaj?

Ky është çast i një lumturie të madhe. Çast me shumë sadisfaksion, që ka filluar me punën, arritjet pas një mundi të madh, miqtë e jetën në të gjitha ngjyrat e saj. Një moment pozitiv, për ta përmbledhur.

Aktualisht jeni marrë edhe me bamirësi. Mund të na tregoni diçka rreth eksperiencës suaj, që sapo patët në Bangladesh?

Mund të them se kjo ka qenë ndoshta përvoja më goditëse e jetës sime! Jo se unë kam lindur në një vend të përkryer, pasi edhe ne në Shqipëri kemi përjetuar situata të vështira, por kurrë, kurrë nuk e kisha menduar se do të gjeja një situatë kaq të rëndë e dramatike. Bëhet fjalë për vendin më të varfër në botë, unë u zgjodha nga UNICEF ITALIA si ambasador i UNICEF, për të dëshmuar punën që kjo organizatë bën në bashkëpunim me qeverinë vendase në ndihmë të fëmijëve. Është një vend që ka mbi 160 milionë banorë, nga këta, 63 milionë janë fëmijë nga mosha 0-18 vjeç. Ishim aty për të mbikëqyrur tri projekte, atë kundër shfrytëzimit të fëmijëve në punë, trafikun e fëmijëve dhe prostitucionit me ta. Tri plagë shumë të rënda që përjetojnë njerëzit e këtij vendi dhe sigurisht ata që e vuajnë më shumë janë pikërisht fëmijët. Vizituam shkolla, fëmijë, duke vëzhguar projektet që realizon UNICEF, për t’i larguar nga rruga këta fëmijë. Atje quheshin fëmijët e rrugës dhe ishte tejet e dhimbshme t’i shihje. Ishte një histori e fortë, që më bëri të reflektoj dhe të mendoj mirë për atë që kemi, që kam personalisht e që kemi të gjithë në shoqërinë e sotme. Ishte ama një gjë që më bëri të përjetoj për ato 10 ditë rresht, një çast ndryshe. Nga fëmijët e atyshëm, mora buzëqeshje aq të ndryshme, e pra ato nuk vinin nga fëmijë të varfër, po nga fëmijë në një mjerim të patregueshëm e të tejskajshëm. Sapo u afroheshe atyre, nuk ishte nevoja t’u flisje në gjuhën tënde, ose ata në të tyren, sepse sakaq lindte një gjuhë universale që ishte buzëqeshja, përkëdhelja apo një përqafim, duke luajtur me ta. Ishin tërësisht vlera të përjetuara aq ndryshe nga bota jonë! Ndoshta duhet të mësojmë edhe ne pak nga ata. Kjo ishte përvoja ime e parë në Bangladesh, që besoj do të vazhdojë, pasi edhe në Itali jam dëshmitar i një fushate në mbrojtje të të huajve: “Unë si ti, kurrë armiq prej lëkurës”, gjë që u kushtohet fëmijëve të emigrantëve që lindin aty. Fushata ka për qëllim sensibilizimin për të drejtat e tyre; nuk është një fushatë për mbledhje fondesh, por një fushatë për të sensibilizuar opinionin publik, që fëmijët e lindur në Itali nga prindër të huaj kanë po ato të drejta me fëmijët italianë. UNICEF Italia më zgjodhi mua për këtë fushatë dhe unë u thashë po, sigurisht.

Kjo kërkesë për të qenë pjesë e fushatës sensibilizuese, ka ardhur tek ju për vetë faktin se jeni një përfaqësues i denjë i të huajve në Itali?

Sigurisht, që më kanë zgjedhur dhe për këtë arsye. Duke e përjetuar edhe unë vetë këtë përvojë, kush më mirë se unë mund ta bënte këtë gjë?! UNICEF ka bërë një sondazh para se të zgjidhte ambasadorin e saj, personin që do ta prezantonte dhe kur ma propozuan këtë fushatë thashë menjëherë “Po”. Pas kësaj mora një mbështetje jo vetëm nga ata, por edhe nga opinioni publik.

Kledi, profesioni juaj është baleti. Keni provuar ekranin, filmin dhe librin. Këto eksperienca të reja tuajat, do të jenë pjesë e vazhdimësisë së karrierës suaj?

Mbeten gjithmonë eksperienca që rrisin më shumë vlerat, por edhe bagazhin e një artisti. Megjithatë, unë kam studiuar kërcim në Shqipëri, jam bërë një balerin, kam investuar një jetë të tërë mbi këtë disiplinë, të gjitha përvojat e tjera, me siguri më kanë ndihmuar të rritem më shumë, por kam mbetur dhe do të jem gjithmonë një balerin, derisa mosha të ma lejojë. Nuk mund të cilësohem si një aktor apo shkrimtar, falë atyre eksperiencave të tjera. Nuk mund të quhesh aktor vetëm me 3-4 përvoja nëpër filma, apo shkrimtar se ke shkruar një libër. Unë nuk mendoj kështu të paktën! Aktrimi nuk është zhanri im, nuk është rruga ime, nuk është objektivi im. Kanë qenë gjëra që më kanë ndodhur rrugës, m’i kanë propozuar, kam reflektuar, dhe nëse kam menduar se duhej provuar, e kam ndërmarrë atë hap. Por nuk kam studiuar një jetë të tërë, për t’u bërë aktor. Kam studiuar të bëhesha balerin dhe do të jem i tillë, pasi nuk mendoj se duhet të nënvlerësoj një gjë, së cilës i kam kushtuar jetën.

Kledi, vazhdoni ta shihni jetën tuaj ‘si një përrallë’ ashtu siç e keni përshkruar në librin tuaj?

Ai ishte një titull që të shtynte ta shihje si një përrallë. Një përrallë, sepse si në të gjitha përrallat, ndodhën disa gjëra që erdhën si rastësisht, por edhe për shkak të talentit e punës, në rastin tim mbase, fati takoi talentin. Jo gjithçka ndodh falë fatit…

Ju besoni apo jo te fati?

Jo, unë besoj te talenti dhe puna, dhe e kam provuar këtë.

Kledi, të qenit ende beqar ju ka bërë më të suksesshëm në Itali?

Jo nuk besoj! Kam qenë edhe i fejuar edhe beqar, por nuk kam përjetuar ndonjë ndryshim të dashurisë që publiku ka pasur për mua, e kështu duhet të jetë, apo jo?

Po në Itali, ku tradita e fansave është më e theksuar, sigurisht që më të preferuar janë beqarët…?!

Eh, kjo është ajo që na kanë bërë të besojmë një jetë të tërë…! Pastaj besoj se kjo ndodh më shumë në Shqipëri, se e para gjë që të pyesin është jo çfarë pune bën, por a je i martuar apo jo?

Aktualisht, keni një histori serioze?

Jo, për momentin s’kam asgjë të re, por do ta merrni vesh kur të vijë ai çast …. Është shumë e vështirë, më saktë unë jam i vështirë, kam shumë pretendime për të gjetur njeriun e duhur!

Tirana do të jetë gjithmonë një stacion i shkurtër për ju?

Jo, nuk do ta quaja stacion të shkurtër, pasi në radhë të parë kam edhe fatin e madh që kam prindërit në Shqipëri, vijnë shumë shpesh në Romë, por edhe unë vij e i takoj në Tiranë. Fija më e fortë që më lidh me Tiranën është familja, sepse asaj ia kam borxh gjithë jetën, për sakrificat që kanë bërë për mua e po ashtu ndjej edhe gëzimin e madh, sepse më duket që më në fund, pas kaq shumë vitesh, ua ktheva diçka mbrapsht. Edhe pse çdo familje, çdo prind, nuk pret kurrë nga fëmija e vet, ngase jep pa fund, pa pritur të marrë diçka në këmbim…

Dikur Tirana ishte një stacion ca më i shkurtër, sepse kam qenë gjithmonë i mbytur në punë, me turne, me programin e Rai5, me shkollën e me aktivitete të ndryshme, që nga baleti dhe deri te jeta sociale me UNICEF. Kështu që më falet… (qesh).

Por kemi disa projekte me Tiranën dhe i pari ishte vizita në Akademi dhe në Teatrin e Operas dhe Baletit. Aty bëmë hapjen e serisë së parë të edicionit të dytë të programit “Step, passi di danza”, që transmetohet në kanalin e RAI5, më 15 shtator. Pata fatin të intervistoj profesorin tim, Agron Aliaj, Luan Shtinon, Blerina Arbanën e Zhani Cikon (drejtorin e TKOB).

Qëllimi i programit është të prezantojë artin e baletit shqiptar në Itali?

Pikërisht ky është objektivi. T’ju tregoj balerinëve italianë, e jo vetëm, baletin e balerinët shqiptarë që punojnë dhe janë të suksesshëm jo vetëm në Itali por në të gjithë Europën. E nisa pikërisht nga kjo Akademi, që ka prodhuar gjithë këta breza talentesh, që nga Ilir Kerni, mësuesi im i baletit klasik, Ludmill Çakalli e Albana Sulejmani, Hektor Budlla, balerin i parë në kompaninë e Reggio Emilia-s, Leart Duraku, balerin në teatrin e Montekarlos, Gentian Dodaj, balerin në Madrid, Altin Kaftira, balerin i parë në Amsterdam, Lola Fejzo dhe talenti femëror që na nderon Anbeta Toromani. Janë gjithë këta emra që do të jenë në pjesën e parë të emisionit, të cilët do të vijnë me intervista të shkurta. E filluam nga Tirana, morëm edhe dy klasa të djemve dhe vajzave të rinj të Belës dhe Luanit. Jemi shumë të kënaqur, jo vetëm unë, por e gjithë trupa e xhirimit.

Misioni vazhdon

Tani një emision për artistët shqiptarë në RAI5

Kledi Kadiu është nderuar nga Presidenti Alfred Moisiu, me çmimin Ambasador i kombit “Për interpretim virtuoz në artet koreografike dhe përfaqësim dinjitoz të imazhit dhe vlerave të Shqipërisë nëpër botë”, çmim i marrë në të njëjtën kohë me Inva Mulën. Këto ditë, Kledi u prit edhe nga ministri i Punëve të Jashtme, Edmond Haxhinasto. Ai ishte i shoqëruar nga një grup produksioni i radio televizionit italian “Rai 5”. Dokumentari televiziv, i cili po realizohet me mbështetjen e Ministrisë së Punëve të Jashtme dhe Ambasadës sonë në Romë, e cila ndihmoi pa masë, do të shfaqet ne televizionin prestigjioz Rai 5 dhe synon të përcjellë një imazh pozitiv për Shqipërinë, akademinë e shkollës artistike shqiptare dhe artistëve të saj kudo që ndodhen, jo vetëm në Itali por dhe në Europë.

ILDA LUMANI MAPO

Emisioni i tij “Step Passi di Danza” ishte ndër më të shikuarit në kanalin Rai 5. Ka mjaftuar kjo që balerini shqiptar Kledi Kadiu të rikthehet në Shqipëri për të realizuar një dokumentar mbi shkollën shqiptare të baletit, prej së cilës ka dalë edhe vetë balerini, tashmë një ikonë e baletit bashkëkohor në Itali. Më këtë mision ka mbërritur në Tiranë balerini shqiptar Kledi Kadiu bashkë me një grup xhirimi të kanalit italian Rai 5.

Xhirimet për realizimin e dokumentarit do të nisin me shkollën e baletit, aty ku balerini mësoi hapat e parë të kërcimit, për ta vazhduar në Akademinë e Arteve të Bukura dhe më pas në skenën e Operas dhe Baletit, ku Kledi u ngjit për herë të parë në skenë si balerin. Protagonist i këtij dokumentari nuk do të jetë vetëm Kledi Kadiu, por të gjithë balerinët shqiptarë që kanë dalë nga shkolla e baletit shqiptar, që tashmë interpretojnë në skenat më prestigjioze të Europës.

Por, edhe pse qëllimi i vizitës këtë radhë është realizimi i një dokumentari, Kledi Kadiu shprehet se një nga projektet e ardhshme të tij është dhe rikthimi në skenën e Teatrit të Operas dhe Baletit. Në fakt kishte premtuar rikthimin në këtë skenë me një nga turnetë më të suksesshme të balerinit, që nisi një vit më parë, “Bolero”, ku një nga ndalesat e tij do të ishte edhe kryeqyteti shqiptar Tirana, por për shkak të axhendës së ngjeshur të turneut “Bolero” ai nuk mundi të vinte në Tiranë në fillim të këtij viti ashtu siç dhe kishte premtuar. Prandaj duket se balerini i ka një “borxh” skenës dhe publikut shqiptar, ku premton se shumë shpejt do ta shlyejë. Ky dokumentar dedikuar shkollës shqiptare të baletit dhe disa balerinëve të njohur dhe shumë të talentuar shqiptarë, si Eno Peçi, Gentjan Doda, Evis Nezha etj., të cilët performojnë në skenat e teatrove më të shquara, jo vetëm në Itali por në të gjithë Europën. Dokumentari televiziv prej 30 minutash pritet të shfaqet në kanalin prestigjioz italian RAI 5.

Premiera në “Step Passi di Danza”

Kledi Kadiu është ura lidhëse mes baletit italian dhe atij shqiptar. Ai është balerini që u formua si i tillë në Shqipëri, por që ndriti në skenat italiane. Ka qenë ndoshta kjo arsyeja që pas edicionit të parë të emisionit “Step Passi di Danza” që iu kushtua tërësisht baletit italian, që nga fillesat e tij e deri sot të projektohej edhe realizimi i një dokumentari edhe për baletin shqiptar. Kjo ka qenë shtysa e realizuesve të programit që kanë sjellë në Shqipëri Kledi Kadiun dhe një grup xhirimi të Rai 5. Siç thotë dhe balerini, edicioni i dytë i programit të tij nis në shtator dhe ai do t’i dedikohet baletit shqiptar. Dokumentari televiziv po realizohet edhe me mbështetjen e Ministrisë së Punëve të Jashtme, që do të shfaqet në kanalin prestigjioz italian Rai 5, ai synon gjithashtu të përcjellë një imazh pozitiv për Shqipërinë, akademinë e shkollës artistike shqiptare dhe artistëve të saj kudo ku ndodhen, jo vetëm në Itali por në të gjithë Europën. Në mbështetje të kësaj, ministri i Jashtëm, Edmond Haxhinasto, priti në një takim zyrtar balerinin shqiptar Kledi Kadiu dhe grupin e xhirimit të Rai 5, ku hodhi dhe idenë e krijimit të “Shtëpisë së Shqiptarëve”, në Romë, e cila do të ketë rolin e një qendre kulturore për të gjithë emigrantët shqiptarë që jetojnë dhe punojnë në Itali. Qendra gjithashtu mund të shërbejë si pikë referimi për qytetarët italianë, të cilët kërkojnë të informohen mbi kulturën, historinë, artin, arkeologjinë dhe turizmin shqiptar.

Aida Tuci Mapo