Pak ditë më parë, këngëtarja Greta Koçi e ka mohuar lajmin për dorëheqjen nga posti e nënkryetares së Forumit Rinor të Partisë Demokratike.

Por, në fakt, vajza jo vetëm nuk është larguar nga ky post, por si duket po e ndien veten shumë mirë, madje është bërë më elegante, duke u marrë me këtë punë.

Siç e shihni edhe në këtë foto, këngëtarja është tëholluar më tepër, duke i dhënë mundësi që ajo të duket më në formë, aty ky është edhe meraku i vajzave artiste. /Maksim Gjokaj/Kosova Sot/

Sa janë të njëjta, janë edhe të ndryshme. Populli ynë ka një shprehje e cila thotë “motra jemi, shoqe s’jemi”, por ne do të sjellim rastet kur ato jo vetëm që janë shoqe të mira, por janë edhe në majat e famës. Diçka që nuk ndodh shpesh, aq më tepër kur flasim për talente si në muzikë apo fusha të tjera të artit. Rrallë nga një familje, dy motra apo vëllezër mund të jenë të talentuar në të njëjtën fushë. Rivaliteti ekziston edhe në familje, jo vetëm jashtë saj. Ndaj ne do të sjellim rastet e motrave të suksesshme shqiptare, të cilat dashur pa dashur janë në të njëjtën kohë edhe rivale dhe pse thuajse asnjëherë nuk e kanë pranuar hapur këtë gjë. Shpesh motra më e vogël ka mbështetjen e asaj më të madhes, por shpesh suksesi që mund të ketë njëra eklipson atë të tjetrës. Se cilat janë ato motra të famshme dhe rivale të heshtura në të njëjtën kohë i zbulojmë më poshtë.

Greta dhe Eni Koçi 

Fillimisht ishte Greta ajo që fitoi famë falë talentit të saj. U bë e njohur qysh në moshë mjaft të vogël me këngë të cilat u bënë hite. Më vonë, pikërisht kur Greta ishte tashmë një zë potent në muzikën shqiptare moderne, motra e saj më e vogël Eni nxori single-in  e saj të parë. Një këngë ku Greta ishte pjesë e klipit për t’i dhënë suportin maksimal vajzës së vogël e të talentuar të familjes Koçi. Cila nga të dyja është më e suksesshme, nuk mund ta themi dot ne, por publiku që i ndjek. Megjithatë, sa i përket xhelozisë mes tyre, Greta dhe Eni gjithmonë kanë dhënë përgjigje që e përjashtojnë këtë mundësi. Greta, si motra më e madhe e këshillon shpesh Enin, dhe Eni si më e vogla e dëgjon dhe i merr sugjerime. Motrat Koçi e ndihmojnë njëra-tjetrën dhe rivalitetin se cila të jetë më në qendër të vëmendjes mes tyre ende nuk e kemi parë. Madje, Greta vërtet po e suporton Enin dhe nuk ka lënë që fama e saj ta eklipsojë në ndonjë moment figurën e së motrës.

Eranda dhe Irma Libohova

Janë një nga çiftet e motrave më të suksesshme në Shqipëri. Dy motra që janë identifikuar përherë me njëra-tjetrën. Madje në fillimet e tyre ato ishin të pandashme, aq sa doli në modë shprehja “si motrat Libohova”, për të identifikuar shpesh dy shoqe të ngushta, të cilat nuk bënin dot pa njëra-tjetrën. Pas viteve ‘90 Irma dhe Eranda filluan të shfaqeshin më tepër vetëm edhe pse bashkëpunimet e suksesshme mes tyre nuk munguan asnjëherë. Të dyja vazhdojnë të mbeten nga këngëtaret më të mira të muzikës së lehtë, e në këtë rast është shumë e vështirë ta bësh diferencën se cila është më e dashur apo më e vlerësuar nga publiku. Ato do të mbeten përherë dy motrat simpatike e të talentuara, që kanë dhënë një kontribut të çmuar për muzikën e lehtë shqiptare.

Marina dhe Luana Vjollca

Fillimisht e nisën si velina të emisionit “Fiks Fare” karrierën e tyre, për t’u shndërruar pastaj në një dyshe mjaft të suksesshme në ekran. Motrat Vjollca, njëra bionde dhe tjetra brune, aq sa janë të ngjashme duket se janë edhe të ndryshme. Diferenca mes tyre ka qenë më e dukshme kjo edhe për shkak të projekteve të ndryshme që kanë marrë përsipër, edhe pse kur janë bashkë duket se janë më të forta. Të dyja janë të bukura, joshëse dhe mjaft elegante. Vështirë të themi se cila prej tyre ka më tepër sukses, edhe pse është Marina ajo që këshillon më tepër Luanën, si motra më e madhe që është. Megjithatë veç gjërave që i bashkojnë, motrat Vjollca përherë janë shprehur edhe për gjërat që i ndajnë e sigurisht edhe pak rivalitet mes tyre ndiejnë herë pas here.

Inis dhe Ingrid Gjoni

Inis dhe Ingrid Gjoni janë dy nga vajzat që për një kohë të gjatë kanë pushtuar faqet e kopertinave të shtypit rozë. Fillimisht ishte Inisi ajo që u bë pjesë e televizionit, duke e provuar veten në shumë fusha, derisa përmbushja dhe realizimi i saj ishte kur si regjisore vendosi në skenë shfaqje të suksesshme si “Salla e banjës”. Ndërsa Ingriti e nisi karrierën fillimisht si modele, ku tiparet e saj të veçanta spikatën duke e bërë atë një nga vajzat me më shumë kopertina në revistat rozë. Të dyja motrat provuan edhe të këndonin së bashku edhe pse ajo që vazhdon karrierën si këngëtare me sukses është Ingriti. Janë të famshme, por me karriera të ndryshme, edhe pse bota e artit i bashkon të dyja. Një detaj që ndoshta nuk e dini është se Ingriti nuk realizon asnjë klip pa këshillat e motrës së saj më të madhe Inisit. Kjo tregon se ato të dyja e mbështesin njëra-tjetrën për të bërë më të mirën në sipërmarrjet e tyre. Aktualisht ato janë të dyja nëna të dy foshjave të vogla, Inisi të Coco Antonel, dhe Ingriti të djalit të saj, të porsaardhur në jetë, Parid.

Mihrije dhe Lora Braha

Të gjithë me siguri njohin këngëtaren e dashur kosovare Mihrije Braha, por shumë pak njohin motrën e saj Lora. Ato të dyja në fakt ngjajnë si binjake. Vështirë të dallosh njërën nga tjetra, edhe pse është lehtë i identifikueshëm suksesi i Mihrijes. Lora, e cila është përpjekur disa herë t’i futet muzikës, le të themi që nuk ia ka dalë dot, edhe pse për këtë ka pasur mbështetjen maksimale të Mihrijes. Madje, dy motrat kanë bërë edhe një duet së bashku. Lora është një femër tepër elegante, edhe pse është nënë e një vajze.

Rovena dhe Irva Stefa

Irva Stefa sigurisht që ka një rol të rëndësishëm në karrierën si këngëtare të Rovena Stefës. Ka qenë ajo që ka menaxhuar suksesin e së motrës dhe këtë e ka bërë më së miri. Megjithatë, menaxhimi i Rovenës nuk e ka penguar aspak Irvën të provojë veten në muzikë. Ajo ka qenë prezente edhe me klip në tregun tonë muzikor. Ndërsa më parë është shprehur se dëshiron që të krijojë një emër të saj personal në muzikë, edhe pse e vlerëson mbështetjen dhe përkrahjen e vazhdueshme në të gjitha format nga motra e saj Rovena.

Gjyste Vulaj dhe Valentina Dedvukaj

Valentina Dedvukaj është një këngëtare mjaft seksi, por ama famën e Gjystes vështirë se do ta tejkalojë ndonjëherë. Madje vetë Valentina, e cila jeton në Amerikë, e ka pohuar se Gjystja është më e talentuar dhe këndon më mirë live se ajo. Pra, deri diku e ka pranuar se është e vështirë ta konkurrojë motrën e saj në muzikë, e po ashtu edhe në format e saj trupore. Të dyja motrat janë për t’u admiruar, po ama Gjystja duket se nuk ndalet kurrë së qeni jo vetëm super në formë, por edhe super provokuese.

MAPO

Greta Koçi, këngëtarja e suksesshme e skenave tona sapo ka lançuar këngën e saj më të re “Çdo hap është peng”, një këngë që është pritur mjaft mirë qysh në versionin e saj audio, pa klip. Këtë vit ky është klipi i parë që Greta lançon dhe sigurisht që edhe vëmendja e fansave ka qenë maksimale. Greta na rrëfen projektet dhe të rejat e saj jo vetëm në muzikë, por edhe ato në politikë. Ky vit ka qenë shumë impenjativ për Gretën, e cila pohon se shpesh ka lënë shumë koncerte për të përmbushur objektivat e saj në FRPDSH.

Greta, gjithashtu na tregon se është një vajzë ambicioze dhe se veten e sheh në një të ardhme në pozicione vendimmarrëse. Këto si dhe disa “copëza” të panjohura nga jeta e saj, Greta Koçi i rrëfen në këtë intervistë për suplementin “Mapomania”.

Greta, sapo ke lançuar këngën më të re, “Çdo hap është peng”. Përse një baladë në fillim të verës?

Më ka pëlqyer kjo këngë që në momentin e parë që e kam dëgjuar. Jam tepër e kënaqur që ka pasur një sukses të madh dhe të menjëhershëm që në momentin kur u lançua si audio. Mendoj se të gjithë kanë dëshirë të dëgjojnë një baladë të bukur edhe në ditët e nxehta të verës.

Në fakt, kohët e fundit duket se jeni dashuruar më së shumti me baladat. A janë baladat më të suksesshme në tregun tonë muzikor?

Unë përherë kam qenë më e dhënë pas baladave. Nuk mund të them që janë baladat më të suksesshmet në tregun tonë muzikor, pasi çdo rrymë muzikore ka specifikën e saj.

Klipi është i pari për këtë vit, në mos gaboj. A do të ketë klipe të reja këtë verë?

Po, jeni të saktë! Në fakt angazhimet e mia janë të shumta dhe nuk mund të premtoj, por do të lançoj së shpejti një single të ri në bashkëpunim me një reper të huaj. Për këtë premtoj që do të jetë një realizim mjaft i mirë dhe i suksesshëm.

Kënga flet për një histori dashurie. Cili është pengu i vajzës në fabul?

Po, kënga flet për një histori dashurie, e cila ka përfunduar. Është një tekst, i cili ka dhimbje për një dashuri të humbur. S’di ç’të them më, pasi gjithsecili mund ta kuptojë dhe ta ndjejë në mënyrën e tij.

Greta, a beson në një dashuri të madhe në jetë?

Patjetër që besoj. Në fund të fundit dashuria që njerëzit i falin njëri-tjetrit na bën të jetojmë, të jemi të lumtur, të kemi motiv për të jetuar jetën. Mendoj se dashuria shëron njerëzit, të dyja palët; edhe ata që e japin, edhe ata që e marrin. Love makes the world go around (qesh).

Gjithmonë hezitoni të thoni nëse keni një person në krah. A mund të zbuloni për lexuesin tonë nëse aktualisht jeni e dashuruar apo jo?

Jo, nuk jam e dashuruar.

A ju ka penguar puna në FRPD në muzikë?

Të them të drejtën, angazhimi im në FRPDSH më ka marrë tepër kohë për sa i përket mundësisë për të prodhuar muzikë. Po mundohem t’i ekuilibroj më së miri, si angazhimin politik edhe atë artistik.

A ju ka penguar puna në FRPD në muzikë?

Po. Tashmë kam lënë mjaft koncerte, por besoj se kjo ka ndodhur pasi janë fazat e realizimit të disa projekteve të mia politike.

E shihni veten një ditë në pozicione vendimmarrëse në politikë?

Çdo njeri duhet të ketë ambicie (qesh). Sigurisht që e shoh. Nëse nuk ke synime, projekte, është e kotë që të marrësh sipërmarrje.

Greta, si i shihni raportet e të rinjve me politikën, meqenëse jeni në Forumin Rinor të PD-së?

Çdo i ri kur angazhohet në një forcë politike, siç është Forumi Rinor i Partisë Demokratike, pikë së pari ka përqafuar programin e kësaj force politike, e mbështet dhe e zhvillon më tej atë. Të rinjtë tanë informohen vazhdimisht mbi situatën politike të vendit. Të rinjtë tanë janë pjesë e rëndësishme në vendimmarrje.

Mendoni se politika mund të ndryshojë gjithçka?

Fjala politikë si term sot është shumë e gjerë dhe kap mjaft sfera, siç është politika shtetërore, familjare, e një komuniteti, politika ekonomike, fiskale etj. Për mendimin tim, politika është një faktor i rëndësishëm në zhvillimin shoqëror.

Greta, sa e vështirë është të menaxhosh vetveten në art?

Është mjaft e vështirë për të menaxhuar vetveten. Një artist për të krijuar një imazh publik, një nivel artistik, duhet medoemos të menaxhohet nga specialistë të fushës. Personalisht asnjëherë nuk më është dashur të vetëmenaxhohem.

A janë të pasur këngëtarët shqiptarë?

Mendoj se në përgjithësi nuk janë të pasur, pasi tregu ynë muzikor është tepër i vogël.

Ti Greta, a e quan veten një vajzë të pasur?

Jo, s’mund ta them këtë. Po mund të them se jetoj mjaft mirë.

Frikë përtej tingujve…

Përse bëhesh nostalgjike?

Nostalgjike bëhem shpesh nga koha, moti. Në ditët me shi pasi dëgjon balada të bukura bëhesh nostalgjik.

Momenti më i lumtur i jetës tënde?

Kam pasur shumë momente të lumtura, të veçanta, të cilat nuk harrohen….por po them se më i lumturi është momenti kur linda (qesh).

Më i vështiri?

Para më pak se një muaji, kur humba gjyshen time, njeriun më të dashur për mua. Ai ka qenë më i vështiri.

Ke frikë nga plakja?

Absolutisht jo edhe plakja është mëse e natyrshme, që do të më ndodhë. Edhe ajo periudhë duhet shijuar, pasi çdo moshë ka kënaqësitë e veta. Kështu është jeta.

Çfarë të frikëson në jetë?

Kam frikë nga ato që s’janë në dorën time dhe jashtë vullnetit tim. Besoj në Zot dhe kjo më bën të besoj se gjithçka do të shkojë mirë.

Muzika e preferuar?

Pop,Balada,R&B…

Garderoba, fashion apo “casual”?

Fashion dhe Casual.

Idealiste apo realiste?

Jam realiste.

Ëndrra në sirtar?

Të realizoj me përpikëri objektivat, synimet që i kam vënë vetes.

Ushqimi që urren?

Nuk mund të them se urrej ndonjë lloj ushqimi. Thjesht nuk i konsumoj shpesh ato receta që nuk shijojnë.

Njeriu më i rëndësishëm?

Familja.

Tipi i mashkullit që nuk duroni dot?

S’ka rëndësi meshkuj apo femra. Njerëzit që nuk janë të njerëzishëm më pengojnë dhe njerëzit që janë falsë.

Sakrifica më e madhe që keni bërë?

Kam sakrifikuar shumë nga mosha ime për të pasur një karrierë ashtu siç duhej, megjithatë nuk pendohem për këtë sakrificë.

A je xheloze?

Jam ambicioze ….

Vesi më i keq cili është?

S’mund të them…Kam vese si çdo njeri, por sinqerisht nuk po mund të veçoj ndonjë gjë tek vetja.

Jonida Hitoveizi MAPO

Dy  motrat e dashura të skenës shqiptare, Greta dhe Eni Koçi, kanë përjetuar së fundmi një humbje të madhe në jetën e tyre. Gjyshja nga ana e mamit, me të cilën vajzat ndanin prej vitesh të njëjtën shtëpi, është ndarë nga jeta duke i lënë pas një boshllëk të madh bukurosheve Koçi.

Siç mësohet dy motrat e kanë vuajtur shumë këtë largim nga jeta të gjyshes së tyre të dashur dhe për ditë me rradhë nuk kanë dalë nga shtëpia.

Elvana Gjata me klipin “Afër dhe larg”, nominuar në pesëshen më të mirë

The Balkan Music Awards 2012″ do të mbledh në Sofje më datë 16 qershor zërat e muzikës ballkanase për tu kurorë- zuar me çmime që tashmë janë kthyer në një traditë që nga 2009. Në ceremoninë e organizuar do të marrin pjesë yjet më të mëdhenj në Ballkan! Shqipëria këtë vit do të prezantohet me Elvana Gjatën me këngën “Afër dhe larg”, Flori Mumajesi me “Tallava”, Greta Koçi me “Milionere e parë” si dhe grupet nga Kosova, NRG Band me këngën “Rina rina” dhe Revolt me “Wanna be number one”.

Sipas të dhënave në faqen e festivalit këngëtarja Elvana Gjata është nominuar në pesëshen më të mirë për klipin 2011 në Ballkan Music Awards 2012.

Sofja do të jetë stacioni i zërave dhe imazheve të muzikës ballkanike më 16 qershor. Që me 20 mars ka nisur votimi i publikut – fansat mund të votojnë online në faqen zyrtare – www.balkanmusicawards.com deri më datë 8 prill!

Kategoritë janë 16 dhe për të votuar duhet të regjistroheni me email. Nominimet finale janë rezultat i votimit të Akademisë Muzikore Ballkanike, e cila u krijua në vitin 2009 dhe bashkon emrat më të mëdhenj ne fushën e muzikës dhe gazetarisë si autorë, producentë dhe gazetarë nga të gjitha vendet e Ballkanit.

Fituesit do të prezantojnë hitet e tyre gjatë ceremonisë zyrtare në qershor.

Nuk e dimë sa e vështirë mund të jetë për një këngëtar, ndërsa sheh kolegët e tij duke kënduar dhe vetë rri e vëzhgon… këtë ndjesi më mirë se kushdo do të mund të na e shpjegonte Greta Koçi, e cila tashmë ka hequr dorë nga veshjet e saj rinore për të qenë në të njëjtën harmoni me pjesën serioze të Partisë Demokratike, si në këtë rast ku gjendet krah ministrit të Financave, Ritvan Bode e ish-ministres Edit Harxhi.

Përballë saj në skenën e ngritur përpara universitetit të Tiranës, kolegët e Gretës këndojnë, kërcejnë dhe shijojnë kënaqësinë që të jep skena… Sa do t’i zgjasë inati për të hipur sërish në skenë Gretës nuk e dimë…

Por, nga fotoja, kuptojmë që ajo për herë të parë kolegët e saj duket se i ka vërtetë zili!  Koha Jone

Anëtarësimi 4-vjeçar në Partinë Demokratike dhe koha e impenjimit në Forumin Rinor. Njohja me Berishën dhe shembulli që sheh për të ndjekur tek kryeministri shqiptar. Ambicjet në politikë të Greta Koçit dhe ruajtja e lidhjeve me muzikën.

Nuk është e lehtë t’i gjesh një ditë të lirë këto kohë Greta Koçit. Nëse deri disa muaj të shkuar në telefonin e saj përgjigjej ekskluzivisht e ëma, e cila dihet që është edhe menaxherja e saj, tani gjërat kanë ndryshuar. Por kjo nuk do të thotë se, pas përgjigjes së sjellshme të përtej telefonit, zërit të ëmbël të Gretës, që pas “alo”-së së parë shndërrohet në miqësor – pas një kohe të gjatë pa folur – mund të sigurosh një takim me të parën. “Jam rrugës së kthimit nga Roskoveci”, thotë. “Flasim sërish sapo të jem në Tiranë për të vendosur një ditë dhe orë takimi”.

Ky është një nga udhëtimet e zakonshme, sidomos që nga tetori i vitit të kaluar dhe këtej. Dhe nuk bëhet fjalë për koncerte apo ftesa që kanë lidhje me artin dhe këngën. Greta është përqëndruar e gjitha në një tur të gjatë prezantimi dhe njohjeje me strukturat e Forumit Rinor të Partisë Demokratike, anë e kënd Shqipërisë. Ka një qëllim të mirëmenduar në kokë: shtimin e numrit të anëtarëve të rinj në FRPD. Po flasim për nënkryetaren e re të këtij forumi, dhe ajo është një këngëtare për të cilën është shkruar dhe folur shpesh si e tillë. Greta numëron shumë takime të ngjashme me këtë të Roskovecit dhe po t’i ndjekësh këto evente të xhiruara, shumica e të cilave lehtësisht të gjetshme edhe në internet, mund të kuptosh fort mirë kuptimin e emërimit të saj në këtë post dhe efektin që shkakton prania e saj në takimet me të rinjtë.

Nuk janë vetëm mbledhje rutinë të anëtarëve të kryesisë. Pamjet shfaqin turma që ndjekin Gretën nga pas me dëshirën për t’i shtrënguar dorën dhe përshëndetur. Mes tyre dallohet 20 vjeçarja që me vështirësi mundohet t’ua bëjë qejfin të gjithëve. E mësuar me të tillë vëmendje rreth saj, famën që gëzon ndër moshatarë dhe jo vetëm, Greta duket e zonja edhe me këtë kostum të ri që i ka veshur vetes dhe që destinacion ka një të vetëm: politikën e madhe. Prandaj pranon të rrëfehet edhe si e tillë: nënkryetare e FRPD-së, studente e shkencave politike, një fytyrë jo edhe aq e re për ambjentet e selisë së partisë në pushtet dhe njëherësh edhe këngëtare që nuk lë pas dorë edhe këngët e reja. Tregon se asgjë nuk i ka ndodhur rastësisht. Është e kujdesshme në çdo përgjigje, në të cilat kryefjalë është kontributi për vendin, përkushtimi serioz, besimi në programin e PD-së dhe sidomos te lideri i saj, idhull për Gretën, anëtare 4-vjeçare e partisë së Berishës, i cili duket të ketë qenë kryesori në votën që vulosi vendimin e emërimit të saj në postin që mban sot.

Nuk i duket vetja as e vogël për atë çfarë po bën në këta muajt e fundit. Greta e vogël, ajo 14 vjeçarja e dikurshme që fshehu moshën kur u shfaq në të parin duet me Erjon Korinin, është rritur. “Mendoj se mosha ime është mosha më e favorshme për të startuar në rrugën e politikës”, thotë ajo duke shtuar se kështu kanë bërë edhe të tjerë para saj. Ka plot shembuj protagonistësh në politikë që e kanë nisur nga Forumi Rinor dhe që sot janë deputetë, ministra dhe po aq eksponentë të rëndësishëm në radhët e së djathtës. Në gjurmë të tyre është vënë edhe Greta, e cila rrëfen për një ambicje të madhe në krah të forcës blu, por të ndjekur me radhë dhe sipas etapave që i duhet një 20 vjeçareje për të arritur deri në majë.

“Po përjetoj një periudhë tepër të bukur. Sigurisht tashmë ditët e mia kanë ndryshuar për shkak të detyrës sime të re dhe angazhimit tim tepër serioz në politikë. Në gjykimin tim, të hysh në politikë do të thotë t’i vendosësh detyrë vetes të kontribuosh për vendin tënd, të japësh maksimumin e mundësive të tua intelektuale e morale. Të merresh me politikë, pikë së pari, do të thotë ta duash atë që bën; do të thotë të jesh tepër e përkushtuar dhe serioze në pikësynimet, të cilat ti i vendos vetes”, thotë ajo.

Idealiste në një ambjent politik ku vetëm idealja nuk ekziston? Sigurisht që duhet filluar me kontribute dhe idealin e një jete më të mirë në vendin mëmë, paçka se në rastin e saj përfitimi është i dyfishtë: Greta merr nga PD-ja kënaqësinë e një pune në të cilën beson, ndërsa kjo e fundit merr nga fama e saj dhe vend më të mirë se ku mund të përqendrohej kjo famë, sesa tek FRPDSH-ja, vështirë të gjendej. Megjithatë Greta, siç thotë, i sheh veç anën e mirë kësaj pune. “Besoj tek programi i PD-së, tek mënyra e qeverisjes dhe e zhvillimit të madh të vendit që i ka dhënë kjo forcë politike”. Beson shumë edhe tek forcat e veta ama. Që nga 15 tetori, dita kur u emërua nënkryetare e Forumit Rinor – “një tjetër kënaqësi e imja e veçantë, për faktin se startimi im zyrtar në politikë, ka përkuar me ditëlindjen e Kryeministrit Berisha!” – Greta ka njohur vetëm anën e mirë të politikës.

Rrëfen për një ambjent të ri pune në të cilin thotë se ndihet komode, për bashkëpunime me njerëz dashamirës dhe sidomos për takime masive me njerëz që e duan. Një fillim i mirë me pak fjalë. I tillë sa për të besuar se jo vetëm që mund t’ia dalë mbanë, por edhe të jetë një drejtuese e mirë dhe e suksesshme siç ia do posti që mban. “Po balancoj profesionin tim teorik me atë praktik”, thotë ajo. “Kam filluar të kem bindjen se mund të jem një drejtuese e mirë. Më pëlqen puna me rininë. Njoh shumë mirë strukturat e organizimit dhe të funksionimit. Konstatoj se në rrugëtimin tim në politikë kam një mbështetje në rritje nga populli”.

Këto muaj të paktën, kështu ka ndodhur. Megjithatë në rastin e saj, shfaqja në një nga podiumet e ngritura nga PD-ja, me një status që për shumëkënd ishte i papritur, u përfol si çudi dhe katapultim i shpejtë i Gretës në qarqet politike, qofshin edhe ato rinore. Mediat me të shpejtë filluan krahasimet mes saj dhe një tjetër kolegeje të Gretës, e shfaqur hapur sidomos nëpër koncertet e organizuara nga PD-ja: Çiljeta Xhilaga. Nëse Çiljeta do të kishte marrë një detyrë në PD me siguri askush nuk do të ishte çuditur meqë ajo nuk i ka fshehur kurrë as bindjet dhe as impenjimet e saj me këtë forcë. Ndërsa Greta dukej rast i ndryshëm, përderisa, deri ditën kur u shpall si më e votuara për postin në Forumin Rinor, nuk kishte rënë ndonjëherë në sy si anëtare dhe me ambicje në të djathtën shqiptare. Por gjërat rrodhën ndryshe. Pavarësisht se Çiljeta ka arritur deri në Këshillin Kombëtar të kësaj partie, si anëtare e tij, Greta pas emërimit në postin e nënkryetares premtonte fillimin e një karriere që shumë vite më vonë mund të përkthehet fare mirë me një status të plotë ndër ata që sot vendosin fatet e vendit.

Duke lënë mënjanë krahasimet me Çiljetën, për të cilën Greta e ka thënë fjalën e vet tashmë- jemi mikesha të mira dhe aspak rivale – rreket të dëshmojë se në fakt nuk ka qenë aspak rastësor ky rrugëtim i saj. Përkundrazi. Për të arritur deri tek FRPDSH-ja i është dashur një angazhim i plotë në aktivitetet masive kulturore dhe politike të PD-së në vend. Pas tyre numëron disa takime që ka pasur me Berishën, “një burrë i madh shteti, një njeri me karakter të fortë dhe me një energji të jashtëzakonshme”.

“E kujtoj fare mirë ditën e parë kur e kam takuar Z.Berisha dhe më ka bërë përshtypje dashamirësia dhe fisnikëria e tij në çdo moment kur ai fliste”, thotë ajo. Pastaj erdhi rasti i Forumit Rinor. Vendi bosh i nënkryetarit u zu nga Greta, pas një votimi të anëtarëve të tij, por sidomos pas simpatisë, me siguri, që këngëtarja kishte injektuar tek numri Një i të djathtës. Paskëtaj, takimet me Berishën dhe jo vetëm, por edhe me anëtarë të tjerë të lartë të partisë dhe qeverisë janë shndërruar në takime rutinë dhe të zakonshme sa herë ia ka dashur puna. “Kam rreth 4 vite që kam aktivizime intensive me Partinë Demokratike. Lidhjet e mia me këtë forcë politike kanë ardhur gradualisht me edukimin tim. Aktualisht jam në përmbyllje të një turi takimesh prezantimi dhe njohje me strukturat e FRPD në të gjithë Shqipërinë, ku synimi bazë është shtimi i anëtarësimeve të reja në këtë forum”, thotë ajo. Kështu kanë rrjedhur ngjarjet dhe karriera e saj e re politike deri tani. Mjaftueshëm të mbara sa për të menduar projekte të tjera më pas, akoma më të mëdha. “Sigurisht që çdo njeri ka ambicjen dhe synimet e tij. Unë aktualisht jam një ndër drejtueset kryesore të Forumit Rinor të PD dhe synimet tona jane të qarta: Konsolidimi i strukturave të FRPD në çdo cep të Shqipërisë dhe jashtë saj, aty ku jetojnë e punojnë emigrantët shqipetar; shtimi i rradhëve të anëtaresimeve dhe realizimin e fitores së madhe, atë të vitit 2013. Mendoj se përfshirja në politikën e madhe vjen në përputhje me arritjet e tua”. E meqë jemi tek kjo e fundit: “Ndihem shumë e shqetësuar për mënyrën se si mbahet peng zhvillimi i vendit nga keqdashja e opozitës, mungesa e dëshirës së bashkëpunimit për qëllimin e vetëm atë të vendit kandidat në BE”, shton Greta. “Nuk mund të imagjinoj që ekzistenca në politikë të të japë akses të konsiderosh kundërshtarin politik si armik, deri në atë masë sa të dëmtosh imazhin dhe prespektivën e zhvillimit të vendit tënd”. Nuk ka dyshime pra që i ka hyrë seriozisht politikës Greta Koçi. E motivuar në krye të herës prej liderit të partisë ku aderon: Sali Berishës. “Tani që jam edhe në një funksion politik dhe në dinamikën e punës së përditshme, konstatoj dhe forcoj bindjen se shembulli më i mirë për të qenë një politikan i sukseshëm është z.Berisha”, e përmbyll ajo. Ai është idhulli i saj, por edhe njeriu që i ka shtrirë dorën për të ëndërruar më shumë. Greta i ka hyrë punës në momentin e duhur. Frytet pret me durim t’ia vjelë një e nga një.

Art dhe politikë

Që kur është zgjedhur nënkryetare e Forumit Rinor të PD-së, Greta Koçi u përgjigjet vetë telefonatave, por edhe kërkesave për intervista. Më të ëmën, Afërditën, ka punë vetëm kur flitet për art. Ajo vazhdon të jetë menaxherja që i koordinon aktivitetet artistike dhe ftesat për koncerte apo bashkëpunime të reja. Sepse edhe pse me politikë, Greta nuk i ka shkëputur lidhjet nga ajo që e bëri të njohur tek e fundit dhe që në një farë mënyre i duhet të jetë mirënjohëse për atë që është sot: kënga. Sapo i ka dhënë dorën e fundit klipit të këngës së re “Çdo hap është një peng” dhe së shpejti premton të shfaqet në të gjitha ekranet muzikore. “Njëkohësisht jam duke punuar edhe për materiale të tjera, të cilat do të publikohen me kalimin e kohës”, thotë duke shtuar se kështu ka zgjedhur të mesmen e artë: T’i bëjë të gjitha. “Mbajtja njëkohësisht e këtyre dy profesioneve, mendoj se ka një sukses të padiskutueshëm në karrierën politike. Një artist i mirë mund të jetë fare mirë një politikan i suksesshëm, sepse artistët kanë një botë të madhe shpirtërore; kanë një mundësi të madhe të depërtojnë shumë shpejt tek njerëzit nëpërmjet artit te tyre. Kemi mjaft shembuj të artistëve që na vërtetojnë suksesin e tyre në politikë”. Kështu beson Greta dhe deri kur politika t’ia marrë të gjithë kohën, premton se kështu do të jetë.

Pergatiti Alida Cenaj Revista Klan

Qe ne festivalet e femijeve ne Shkoder, te pjesemarrjet te “Gjeniu i vogel” apo dhe kualifikimi ne 30 kengetaret me te mire te “Etheve”, Greta Koci ka ndrushuar me ritme galopante. Nje kengetare e mrekullueshme e kengeve popullore vlonjate, kengeve italiane, ne vecanti te kengeve te Laura Pausinit, arriti shpejt e shpejt te ngjiste shkallet e karrieres, jo vetem artistike.

Mbaj mend nje vajze, e cila nuk jepte pershtypjen e nje 15-vjecare, madje shume  e cilesonin si Greta qe nuk u rrit pavarsisht viteve te kaluara. Nuk e perjetoi fort largimin nga spektaklet e te premteve mbrema. Gjithsesi gjeti menyrat per tu rishfaqur me ne forme se kurre.

Nje potencial vokal per tu admiruar dhe nje mbeshtetje absolute e se emes i hapen dyert e suksesit kengetares Greta Koci. Performanca “Live” dhe bashkepunime me emrat me ne ze te muzikes, e risillnin vajzen ne skene me kenge te vecanta e teper te bukura.

Koncerte te mbushura plot e per plot e bene te kuptonte se tashme kishte filluar simpatine e publikut, dhe kete e perdori ne figuren e saj publike.

Greta tashme i ka hyre politikes, ka vene te gjitha forcat per te vendosur nje rekord suksesi. Forca Greta!

Gazeta Paloma

Jemi mësuar me vajzat e show-bizit shqiptar që të reklamojnë mamatë e tyre, por të reklamosh edhe gjyshen këtë se kishim dëgjuar. Për të folur për këtë lajm duhet të shkojmë te këngëtraja Greta Koci, e cila sic e shihni në këtë foto ka reklamuar gjyshen e saj simpatike.

Këngëtarja që kohët e fundit po na tregon vetëm takimet e saja me të rinjtë e politikës blu në Shqipëri, nuk ka dashur të tregojë foto me mamanë e saj, që besojmë për ata që e kanë parë është e bukur si bijat. Megjithatë do të shohim se cila gjyshe e ka rradhën për tu prezantuar tashmë./Albavipnews/

Ka bërë vërtet ndërhyrje kirurgjikale, apo ky është një truk me photoshop? Kjo foto e këngëtares 20-vjeçare, Greta Koçi, që po qarkullon këto ditë në rrjetet e ndryshme sociale, është nga më të diskutuarat mes fansash që ndahen në dy grupe.

Ka nga ata që mendojnë se Greta ka zvogëluar hundën, ndërsa të tjerë që thonë se është thjesht një ndryshim që i është bërë fotos me photoshop.  Në foton ku bie në sy tjetërsimi i hundës së saj, Greta shfaqet me pamje të re, ndërsa pozon duke prezantuar me dashje ndërhyrjen e bërë në portret.

Nuk dihet ende nëse Greta ka operuar vërtet hundën apo nëse ky është një modifikim kompjuterik. Gjithsesi, për pamjen që shihni në foto, ka pasur komente se nëse e ka bërë operacion hundën, e ka zvogëluar pak si shumë në krahasim me tiparet e tjera të fytyrës dhe se nuk i shkon sa duhet.

Pak muaj më parë, Greta u komentua për ndërhyrjen në buzë, edhe pse këngëtarja nuk e ka pohuar asnjëherë këtë fakt mediatikisht.

PanoramaPlus

Përfshirja e këngetareve Ciljeta Xhilaga dhe Greta Koci në Partinë Demokratike është diskutuar shumë së fundmi. Gojet e liga kanë thënë se Greta Koci i ka zënë vendin Ciljetës, ndonëse Koci nuk mban të njëjtin post me të.

Greta është emëruar para pak kohësh në postin e nënkryetares së Forumit Rinor të Partisë Demokratike, ndërsa Cili mban prej një kohe realetivisht të gjatë pozicionin e antares së Asamblesë së PD-së.

E pyetur ne emisionin “Zone e Lire” te Arian Canit, ku ishte e ftuar me kolegen e saj Ingrid Gjoni, Ciljeta ka thene se nuk ka aspak inat me Greta Kocin. Jo perkundrazi e kam shprehur gjithmone dhe e them vazhdimisht qe le te shtohen kengetaret ne rradhet e PD-se.

Kam marredhenie shume te mira me familjen Koci, ka sqaruar kengetarja seksi, e cila gjate bisedes ka treguar se eshte shume besimtare, shkon ne xhami dhe agjiron kur ka mundesi.

Fjoralba Shahaj Gazeta Standard

Kryeministri Berisha ka sulmuar gjatë ditës së djeshme mediat, veçanërisht gazetarët e faqeve rozë, të cilët veç të rejave nga bota e spektaklit pasqyrojnë në gazeta edhe detaje sekrete nga jeta private e personazheve publike.

Në mbledhjen e qeverisë ai paralajmëroi se do të ndryshojë ligji “Për të dhënat personale”, për t’i dhënë një mbrojtje më të mirë personave nën hetim, por në mënyrë të veçantë artistëve dhe këngëtarëve.

Kreu i qeverisë mori përsipër të flasë dhe me përqindje matematikore mbi vërtetësinë e atyre që shkruhen në mediat tona për VIP-at shqiptarë: “Pothuaj e tëra, në masën 80 për qind, bazohet absolutisht mbi scoop-in dhe jo ndodhinë reale. Përdoret scoop-i mediatik për të gjetur hapësira më të mëdha tregu e për të lënduar në mënyrën më të papranueshme kryesisht këngëtaret e artistet, më së fundi edhe meshkujt e më pas, edhe të tjerë”, – tha Berisha,

Kurse shtoi: “Qëmtohet e hulumtohet me një pasion patologjik mbi të dhënat personale private dhe jetën private të tjetrit”.

Nisur nga ky fakt, Berisha paralajmëroi se në këtë drejtim ligji do të rreptësohet: “Gjykoj se është e domosdoshme të ndërhyhet edhe në Kodin Penal, në interesin më maksimal të mbrojtjes së privatësisë”.

Berisha u ndal dhe në suplementet e fundjavës në gazetat shqiptare: “Po të vini re, wekend-i është i mbushur me shpifje, trillime, imagjinata nga më vulgaret, për këngëtaret, artistet, këngëtarët, artistët, si në asnjë vend tjetër”.

Këtu ai bëri një krahasim: “Ka edhe në botë nga një apo dy tabloide, por në fundjavë, shtypi shqiptar vihet në garë si të jetë më sensacional se tjetri”.

“Prandaj, – tha Berisha, duhet një mbrojtje ligjore ndaj dinjitetit dhe personalitetit të artistëve, shkrimtarëve, njerëzve tanë të artit, pasi e vërteta është se këta janë më së shumti objekt i një agresioni të vërtetë mediatik”.

Megjithatë, kryeministri nuk është i vetmi që mendon kështu. Në të njëjtin kah me të qëndrojnë edhe këngëtarët, të cilët si gjithmonë kërkojnë që të jenë prezentë në gazeta, vetëm për gjërat që ata duan të tregojnë, duke përfshirë rrallë herë në këtë mes edhe jetën private.

Mes rreshtave që do të pasojnë, do të sjellim për ju këndvështrimet e dy këngëtarëve: Çiljetës dhe Greta Koçit, te cilat mendojnë  njëjtë me kreun e ekzekutivit.

ÇILJETA XHILAGA
Këngëtarja Çiljeta Xhilaga është një nga ato emra që me apo dashjen e saj e ka gjetur veten çdo fundjavë në kopertinën e ndonjë gazete, shpeshherë edhe me tituj abuzivë. E është pikërisht ky fakt, ai që e ka bërë Çiljetën, e cila përveçse këngëtare e njohur është edhe anëtare e Këshillit Kombëtar të PD-së, të mendojë njësoj si kryeministri. Këngëtarja seksi ka thënë për “Gazeta Shqiptare” se: Përkrah në mënyrë absolute nismën e kryeministrit Berisha. Ka ardhur koha që gazetat të fokusohen më së shumti në jetën profesionale të artistëve dhe t’i lënë ata ta jetojnë të qetë jetën e tyre jashtë skenës. Këngëtarja ka shtuar, se gazetat janë bërë jo rrallëherë shqetësim për familjarët e saj dhe si për fund ka thënë: “Ka ardhur koha të marrin fund shkrimet e pabaza, të cilat na shqetësojnë çdo fundjavë familjarët dhe na e nxijnë jetën ne këngëtarëve”.
GRETA KOÇI
Një tjetër këngëtare e dashur për publikun shqiptar ka pranuar të japë qëndrimin e saj lidhur me këtë çështje. Greta Koçi, njëkohësisht anëtare dhe nënkryetare e Forumit Rinor të Partisë Demokratike, bën me dije se përkrah nismën e kryeministrit Berisha.

“Është nisma më e drejtë e Kryeministrit Berisha, madje mund të them se ky ligj duhej ndryshuar me kohë, si dhe duhet të shtrihet edhe më tej, në median elektronike si Facebook, YouTube, Google, ku shpifjet dhe abuzimet ndaj personave publikë janë të paimagjinueshme. Të gjithë artistët janë të prekur nga fenomeni i informacioneve të rreme, të cilat mediatisht quhen ‘skupe’. Çdo informacion mediatik ndaj një individi, në të cilin denigrohet personaliteti, imazhi dhe gjithçka që flitet mbi jetën dhe familjen e tij, duhet të mbrohet me ligj. Ka shumë raste, kur mediat godasin personat publikë, duke shpifur ndaj tyre dhe nuk mbajnë asnjë përgjegjësi ligjore ndaj shpifjeve që bëjnë. Ndëshkimi ligjor ndaj mediave që shpifin, por edhe prekin privatësinë e individit, publik apo jo publik, nuk do të thotë mungesë e lirisë së shtypit apo mungesë e demokracisë në vend, përkundrazi është demokraci zbatimi i ligjit dhe mbrojtjes së të drejtave të njeriut”,- ka thënë Greta.
(Eraldo Rexho/Gazeta Shqiptare/)

Ajo i është futur seriozisht politikës dhe si duket po ia del me sukses, të paktën kështu thuhet. Kjo është Greta Koçi, e cila çdo ecje të saj e tregon qoftë dhe me një mesazh në rrjetin social.

Por, shqetësimi ynë është se asaj i duhet të jetë dhe të vishet serioze kur është në punë dhe ndryshe, qoftë nga dukja e fytyrës e deri te veshja, kur është në shtëpi. E, megjithatë, sipas vendit ajo e bën edhe kuvendin.

Këto do të jenë dy botët e kundërta të këngëtares me origjinë nga Shkodra, Greta Koçi. Por sa do të rezistojë me këto dy mënyra jetese nuk i dihet.

Ndërsa, thuhet se kaq shumë vajza është dashuruar pas politikës, saqë muzikën e ka harruar krejt. M. GJ Kosova Sot

Përherë e më shpesh këngëtarët tanë po përfshihen në jetën politike të vendit. Teksa nuk dimë ç’të themi rreth punës së tyre në politikë, pasi nuk kemi ndonjë informacion rreth aftësive të tyre, le të shpresojmë që të paktën të bëjnë diçka më tepër për artin në vend.

Greta Koçi është këngëtarja e fundit që i është bashkangjitur rradhëve të Partisë Demokratike, e së fundmi është shndërruar dhe në imazhin e posterit të ri të Foruimit Rinor Demokratik.  Albaniac

Për çfarë e pyet veten Greta Koçi? Aq më tepër në një moment të tillë, kur ajo gëzon një sukses të jashtëzakonshëm, që e tejkalon muzikën. Përveç emrit të madh që ka arritur të ndërtojë, përveç hiteve dhe një radioje super të dëgjuar, ja ku vjen arritja e radhës: Greta konfirmohet nënkryetare e Forumit Rinor të Partisë Demokratike nga vetë kryetari i kësaj force politike, zoti Sali Berisha.

Ne e kemi pyetur Gretën në lidhje me emocionet që po përjeton pas këtij angazhimi të ri në jetën e saj, por e kemi pyetur gjithashtu edhe për raportin e saj me të motrën, Enin, si dhe për ato që ndodhën pas votimeve në “Kënga magjike”…

Greta, më tërhoqën menjëherë vëmendjen këta vathët e tu, që shkruajnë “Love”. Kush t`i ka dhuruar?

- Jo, i kam blerë vetë. I pashë diku dhe më pëlqeu që lexonin “Love”… I vendos herë pas here (buzëqesh).

Meqë ra fjala, me dashurinë si i ke punët?

- Nuk jam e dashuruar, por jam e rrethuar nga familja dhe miqtë, që më dhurojnë shumë dashuri.

Me Enin si i ke marrëdhëniet? Ziheni ndopak?

- Kur kam unë kohë të merrem me të, zihemi nga pak (qesh). Bëj shaka! E dua shumë, sepse pavarësisht nga fakti që kemi natyra të ndryshme, është njeriu që ndiej më afër. Eni është tip shumë ekspresiv dhe unë e qetë, por çuditërisht ndonjëherë na hahet muhabeti.

Ndani sekrete me njëra-tjetrën, të cilat nuk i ndani me askënd tjetër?

- Eni është shoqja ime më e mirë. Edhe unë, besoj, jam mikesha e saj më e mirë, ndonëse ka edhe një shoqe tjetër, për të cilën unë bëhem xheloze (qesh). Nuk jemi thjesht motra, por edhe shoqe shumë të mira.

I merr ti mendime asaj kur je përpara ndonjë problemi apo zgjedhjeje të rëndësishme?

- Patjetër! Pavarësisht se është e vogël në moshë, me të ka ndodhur e njëjta gjë si me mua: është më e rritur për moshën që ka. Është shumë e zgjuar dhe e pjekur, kështu që me të mund të diskutosh edhe për gjëra të rëndësishme e pse jo, t`i marrësh mendime. I besoj shumë asaj! Njeriu ka nevojë herë pas here të flasë dhe në rastin tim, që jam një personazh publik, këtë s`mund ta bëj me këdo. Të kesh një njeri kaq të afërt dhe të kuptueshëm në të njëjtën kohë është lehtësim i madh, pasi gjithçka që i them Enit mbetet mes nesh.

Në fillimet e saj Eni përmendej si motra jote mbi të gjitha, paçka këngëve shumë të bukura, kurse kohët e fundit mund të themi se shtypi dhe publiku fokusohet tek ajo si një artiste e mirëfilltë dhe e pavarur. Të vjen keq që nuk e shohin më si “motra e Gretës”, por thjesht si Eni Koçi?

- Përkundrazi, më bëhet shumë qejfi, sepse unë jam përkushtuar shumë që Eni të kishte sukses dhe të mbërrinte deri këtu. Tashmë që e shoh të rritur si artiste dhe që ka arritur këtë popullaritet e dashuri të publikut, ndihem shumë e lumtur (buzëqesh). Është e vështirë që një këngëtar të depërtojë sot në këtë treg të tejmbushur, ku dhe konkurrenca bën të vetën. Kurse Eni shumë shpejt ia doli të afirmohet, gjë që është e habitshme për mua, por njëkohësisht më bëhet qejfi.

Nuk e sheh si konkurrente?

- Jo, aspak (buzëqesh).

Flasim pak për “Këngën magjike”… Ti u paraqite javën e fundit tek “E diela shqiptare”. Pse? Ishe në mëdyshje të merrje pjesë apo jo?

- Jo, nuk isha në mëdyshje, isha duke u përgatitur. Pas angazhimeve të mia të fundit në politikë, koha ka qenë tepër e kufizuar. Ka qenë thjesht çështje kohe, kjo më detyroi ta prezantoja këngën javën e fundit.

Megjithëse kënga u prezantua më vonë se të tjerat, u bë menjëherë e dashur për publikun. Çfarë e bën kaq të dashur këtë këngë, sipas teje?

- Unë mendoj se një përqindje të madhe të suksesit këngët e kanë prej tekstit. Teksti është po aq i rëndësishëm sa muzika apo interpretimi. Tema që trajton kjo këngë, miqtë që tradhtojnë, që futen midis dy njerëzve dhe prishin një dashuri të madhe, e bën këngën të veçantë. Përveç kësaj, artistët që kanë një karrierë dhe një emër të madh, ngjallin kuriozitet. Edhe në momentin e fundit të dalë në skenë, kënga e tyre do të dëgjohet, pasi emri i tyre është një garanci se bëhet fjalë për një krijim të bukur. Sigurisht, edhe kënga duhet ta justifikojë interesin e madh, përndryshe publiku mund të zhgënjehet dhe kjo e dëmton shumë një artist të afirmuar. Ai humbet besueshmërinë.

Me “Pyes veten” jo vetëm që hyre në finale, por edhe more “Çmimin e interpretimit”… E kënaqur me këtë çmim?

- Është një çmim i rëndësishëm, sepse vlerësohet në kompleksitet, jo vetëm kënga, por edhe vokali, mënyra se si përcjell ndjenjat dhe emocionet, performanca etj. U kënaqa për këtë vlerësim që mora, e ndjeva, edhe pse e kam fituar edhe vitin e kaluar.

Për ty ka qenë e sikletshme kjo puna e të votuarit të kolegëve?

- Jashtë mase e sikletshme, çdo vit është i njëjti avaz. Çdo vit kur përfundon “Kënga magjike” them se nuk do të marr më pjesë, por pastaj kjo kalon, pasi mbarojnë ato dy muajt kur je e ngarkuar emocionalisht. Je në siklet të paparë, nuk di çfarë të bësh me vetëm njëzet pikë që ke në dispozicion.   

Pati pakënaqësi për ato njëzet pikët që shpërndave ti?

- E kam ndërgjegjen të qetë në këtë pikë, besoj se kam votuar drejt. Kam dhënët pikët maksimale për ato këngë që mendoj realisht se janë më të bukurat, pa u ndikuar nga klane apo lobingje të caktuara.

Mendon se kolegët që kanë votuar për ty janë ndikuar disi nga lobingjet?

- Po, ka pasur që janë ndikuar, gjë për të cilën më vjen keq. Pse duhet të ndikohet një artist nga miqësitë? Sado e sikletshme të jetë kjo procedurë e të votuarit, neve si artistë na takonte të vepronim me objektivitet. Edhe për mua ka qenë e vështirë, megjithatë kjo nuk do të thotë se kam lënë pa votuar këngët e bukura. Këto ndodhin sepse këngëtarët nuk duan t`ia prishin kompozitorit apo ndonjë kolegu se u gjen koncerte. Pra, është çështje jo vetëm inati, por edhe interesash të ngushta që hyjnë në lojë, gjë nga e cila unë jam krejtësisht e përjashtuar, sepse nuk kam dhe nuk kanë ndonjë interes të caktuar ndaj meje. Kjo kuptohet fare qartë nga mënyra se si unë kam votuar.

Ajo që na bëri përshtypje ishte se Pirro Çako, që është kompozitori i këngës tënde, të kishte dhënë vetëm shtatë pikë…

- Mmmm… Edhe mua më ka bërë përshtypje ky fakt. Më erdhi keq, sepse çfarë mund të presësh nga një kompozitor kur ai nuk vlerëson këngën e tij. Sado që unë kam respekt për figurën e tij artistike, pasi Pirro ka tërë këto vite që punon dhe është një kantautor i suksesshëm, por unë kështu i shoh gjërat. Asgjë personale… Nuk po them pse vlerësoi me njëzet pikë njërën prej këngëve të tij (“Botën do ndryshoja”), teksa këngës tjetër, po krijim i tij, i dha vetëm shtatë pikë. Edhe unë vetë e vlerësova këngën e Besës, i dhashë jo pak por 18 pikë. Nuk kam asgjë kundër, as nuk dua t`i hyj atij diskutimi, pasi kënga ishte e bukur. Por Pirroja, për mendimin tim, ose nuk duhej të kishte vlerësuar asnjë nga këngët që kishte bërë vetë ose duhej të ishte treguar më korrekt. Të mos e fusësh fare në dhjetëshen më të mirë një këngë që e ke bërë vetë? Mua kjo më duket e tepërt! Nga ana tjetër, falënderoj përzemërsisht Darko Dimitrovin, i cili me punën kolosale që ka bërë i ka dhënë një tjetër frymë këngës. Puna e tij ka qenë e jashtëzakonshme në rastin e “Pyes veten”.   

Mendon se kjo që ka ndodhur do të ndikojë në raportin mes teje dhe Pirros?

- Ka ndikuar tashmë! Unë vërtet jam një njeri që përpiqem të jem objektive në gjykimet e mia, por kur më bëhet një padrejtësi, di edhe të mbaj qëndrim.

Për kureshtje, sa pikë i dhe Redonit?

- 11 pikë, kurse ai mua më dha zero pikë. Është këngëtar i mirë dhe këngën e kishte të bukur. Nuk e prisja që ai mos të më jepte asnjë pikë, megjithatë gëzohem për fitoren e tij. Dhe kur është fituar një çmim tashmë, nuk ka vlerë të diskutohet dhe as nuk më duket e drejtë. E kam provuar në kurrizin tim të fitoj një çmim të parë dhe të përflitem nga pas. Nuk është një ndjesi e bukur. I uroj shumë suksese Redonit!

Nuk të pamë tek “E diela shqiptare” të nesërmen, pas finales së “Këngës magjike”. Cila ishte arsyeja e kësaj mungese?

- Por shkova në darkën që organizoi Arditi, sepse unë kam shumë respekt për të. Thjesht pata disa impenjime dhe s`mund të shkoja të dielën. Nuk është se mbajta ndonjë qëndrim ndaj Arditit, sepse realisht këtë vit kam kuptuar se ai nuk ka lidhje fare me atë çfarë ndodh në festival. Gjithçka është në dorën e vetë artistëve.

Duke të të komplimentuar edhe një herë për këngën, ndryshojmë temë… Si po ecin punët në “GM radio”?

- Habitem me gjithë këtë sukses që ka radio, pasi më thonë që dëgjohet shumë nëpër makina apo lokale. Artistët, kolegët e di se e mbajnë tërë kohën aty (buzëqesh). Mendoj se njerëzit e pëlqejnë “GM radio” sepse aty transmetohet muzikë e bukur.

Sa gisht ke ti në radio?

- Sigurisht, aty ka njerëz profesionistë që kujdesen për radion. Unë e ndërtova si strukturë fillimisht, pastaj ishin të shumtë njerëzit që janë kujdesur që “GM radio” të arrijë këtu ku është sot.

Prej dy javësh mban postin e nënkryetares së përgjithshme të Forumit Rinor të Partisë Demokratike. Çfarë do të thotë për ty ky titull?

- Unë kam qenë gjithmonë me bindje të djathta dhe e kam ndjekur gjithmonë me interes ecurinë dhe zhvillimin e vendit. Kam krijuar këtë bindje… Pse? Të rri e të rreshtoj të gjitha sukseset e kësaj qeverie nuk do na mjaftonte gazeta. Janë gjëra të prekshme, ndaj dhe unë, si çdo njeri tjetër, mund ta kuptoj lehtësisht se nga cila anë duhet të qëndroj (buzëqesh).

Ka shumë diferencë ky angazhim i ri nga muzika?

- Ka disa ndryshime, megjithatë unë përsëri edhe në këto takimet politike jam tip sportiv.

E sheh veten edhe në të ardhmen në politikë?

- Si fillim unë dua të jap kontributin tim në këtë moment, pastaj gradualisht dhe me kohën do të shoh se si do të ecin gjërat.

Ti për shkenca politike studion, kështu që nëse një ditë bëhesh kryetare parlamenti nuk duhet të habitemi, apo jo?

- Jo, jo (qesh)!

Gentian Minga PALOMA