Korab Shaqiri: Nuk e kam ndërmend të bëj duet me Zajmina Vasjarin

Pjesëmarrës në shumë festivale të zhvilluara në Tiranë dhe aktualisht garues në edicionin e shtatë të “Top Fest”.

Ndërkohë ai po përgatitet që të hedhë në treg albumin e tij të dytë, i cili do të shoqërohet edhe me tre videoklipe të radhës. Gjatë intervistës së zhvilluar me të, Korab Shaqiri nuk ngurron të rrëfejë edhe se, muzika është një mjet i mirë për të jetuar.

Por çfarë i pëlqen atij tek një femër? Me kë është i dashuruar? Dhe shumë çka tjetër.

Krahasuar me atë kosovare, në ç’nivel ju duket muzika shqiptare Korab?

Mendoj se deri diku është e njëjta gjë, sepse janë hapur më shumë rrugët dhe janë krijuar më shumë shanset që një këngëtar të arrijë aty ku dëshiron dhe tashmë ka dalë një farë balance përsa i përket muzikës shqiptare dhe asaj kosovare. Ndërsa dua të theksoj që muzika klasike në Shqipëri ka një nivel më të lartë se ajo kosovare për arsye se ka përvojë më të madhe dhe studimet janë bërë jashtë në konservatoriume të huaja. Ndaj dhe mendoj që kjo lloj muzike ka nivel më të lartë në Shqipëri. 

Projektet e tua në muzikë që presin “të vihen në jetë”?

Albumi i dytë, shkolla dhe një musical, të cilën po e bëj për mbretëreshën Teuta. Albumit do t’i bashkëngjiten edhe tre videoklipe. Gjithashtu kam dhe një ide për një muzikë filmi shqiptaro-amerikan, i cili bëhet në hollyëood dhe shpresoj shumë që ta marr.

Ku është më shumë aktiv Korabi, në festivalet që zhvillohen në Kosovë, apo në Shqipëri?

Të jem i sinqertë në festivalet shqiptare kam marrë pjesë më shumë. Kam marrë pjesë disa herë tek “Kënga magjike”, si edhe tek “Top Fest”, ku jam konkurrues me një baladë edhe këtë vit. Ndërsa në Kosovë kam marrë pjesë vetëm një herë tek “Zambaku i Prizrenit” që mbahet në Prizren, ku mora dhe çmimin e parë të jurisë.

Me cilën prej këngëtareve shqiptare do të donit të bënit një duet?

Në fakt kemi shumë zëra të rinj të bukur, si femra ashtu edhe meshkuj, por ndonjë ide të veçantë nuk kam, pasi nuk kam menduar akoma për një duet. Më pëlqen shumë zëri i Leonora Poloskës dhe i Aurela Gaçes.

Në një artikull të shkruar në një nga të përjavshmet rozë kemi lexuar se ju do të bashkëpunoni me Zajmina Vasjarin për një duet, sa e vërtetë është kjo?

Jo, nuk është aspak e vërtetë, sepse dhe unë e kam parë këtë artikull dhe është thjesht një thashethem. Nuk kam ndërmend të bëj ndonjë duet me Zajminën dhe kjo jo për ndonjë arsye të veçantë, pasi unë e kam shumë mike Zajminën, por s’kemi menduar për ndonjë duet.

Si reagon Korabi ndaj thashethemeve?

Shpeshherë edhe më pëlqejnë ato që fliten për mua. Në Gjakovë thuhet një shprehje: “Lum ai që të tjerët flasin për të”. Përsa i përket anës profesionale jam shumë i kënaqur me thashethemet që kanë dalë, pasi deri tani kanë qenë pozitive, ndërsa përsa i përket anës private disa më kanë pëlqyer e disa jo, por në përgjithësi më kanë pëlqyer.

Thashethemi që ju ka prekur më shumë?

Thashethemi më i keq? Kanë dalë disa shkrime sikur unë jam i lidhur me një modele, e cila ka qenë e fejuar dhe ka një fëmijë e që unë do të martohesha me të.

Ndërkohë me zemrën e Korabit çfarë po ndodh?

Jam i dashuruar më shumë me punën, ndërsa përsa i përket një femre akoma nuk e kam gjetur një të veçantë që të dashurohem, por kjo nuk do të thotë që s’jam fare i dashuruar, ose që s’kam një femër. Unë e them shpesh që mjerë ai që nuk dashurohet….

Me çfarë merret ajo “femra”?

Femra në fjalë merret me fashion design.

Po në një të ardhme do ta finalizoni lidhjen tuaj me një fejesë?

Besoj se po, por jo tani se është ende herët, besoj diku pas pesë, ose gjashtë vjetësh. Kur të përmendet ajo femër, pra femra ime dua të krenohet emri i Korab Shaqirit.

Çmenduria më e madhe që keni bërë për një femër?

Besoj e keni parë klipin me titull “A dalim sonte” e kam lutur gjithë natën një femër për të dalë dhe kjo besoj ka qenë edhe çmenduria ime më e madhe.

Teksti i kësaj kënge është për vajzën në fjalë?

Ah, këtë nuk e di duhet të pyesni babain që ka shkruar tekstin (ha ha ha).

Sa liberal është Korabi në një marrëdhënie?

Jam shumë liberal dhe aspak xheloz. Mendoj se xhelozia të sjell gjithmonë vetëm të këqija. Të them të vërtetën deri më tani nuk kam qenë në një lidhje, të cilën kam vendosur ta çoj edhe më tej dhe nuk jam bërë xheloz ndonjëherë.

Sa e mbështesni ju thënien “Pa xhelozi nuk ka dashuri”?

Aspak. Besoj se xhelozi mund të ketë, por dhe siç e theksova pa e tepruar.

Atëherë personi me të cilën ju jeni aktualisht?

Nuk besoj se ndihet xheloze. Ajo është njeriu që mendoj për kohën e lirë dhe çoj një dashuri me të dhe nuk ndihet aspak xheloze pasi i kemi saktësuar gjërat që në fillim edhe kemi vendos që unë këtë punë ta bëj, sepse është profesioni im, ndërsa jeta personale është diçka tjetër.

Të pëlqejnë më shumë femrat shqiptare, apo kosovare?

Është fakt se të gjithë kosovarët thonë që femrat shqiptare janë shumë të bukura. Unë do doja ta kisha bërë dallimin mes tyre, por femrat shqiptare janë shumë tërheqëse, duken bukur dhe mendoj që ka më shumë femra të bukura në Tiranë, sesa në Prishtinë.

Pse mendoni kështu?

Nuk e di, ndoshta pasi kam kaluar moshën e pjekurisë në Tiranë edhe jam ndjerë vërtetë bukur dhe kam parë shumë femra të bukura.

Nëse do ju bëhej një ofertë për të jetuar në Shqipëri çfarë do të bënit?

Edhe pa asnjë ofertë do kisha dashur të jetoja në Tiranë, sepse më pëlqen pa masë.

Kujt i ngjani më shumë nënës, apo babait?

Më kanë thënë të gjithë se je djali i babës edhe mendoj se i ngjaj shumë babit, si në fizik, ashtu edhe në profesion.

Ishte babai ai që ju ka shtyrë drejt rrugës së muzikës?

Geni trashëgohet nga prindi tek fëmija. Suksesi i babait më ka shtyrë të vazhdoj me muzikën që në moshën pesë vjeçare. Kam mbaruar shkollën fillore për piano, të mesmen për kanto dhe Akademinë e Arteve për kompozicion që tashmë vazhdoj edhe masterin.

A këndoni nëpër dasma?

Jo, nuk është diçka që unë kam dashur ta bëj. Nuk e di ndoshta më vonë dhe në një moshë tjetër edhe mund ta provoj, por një herë për një herë jo.

Do t’ju shohim në ndonjë duet me babain tuaj?

Deri tani kam bërë një trio me babain që ka qenë në një program televiziv në Kosovë. Ende nuk kemi menduar për një duet që të bëhet hit nëpër televizione, por në të ardhmen mendoj se do ndodhë.

Sipas jush, a është muzika një mënyrë e mirë për të jetuar?

Po, mendoj se është. Unë për vete muzikën kam të vetmen gjë që fitoj momentalisht dhe nuk merrem me asgjë tjetër. Kam dy punë për arsye se unë kam dhe studion time, aty regjistroj, kompozoj dhe këndoj, kështu që mendoj se muzika ia vlen.

Këndoni shpesh në lokale me muzikë “live”?

Po këndoj. Kemi disa këngë të cilat për arsye teknike nuk këndohen live, por ato që mund të bëhen live i bëjmë live.

Sa e vështirë është sot t’i mbijetosh tregut të muzikës sonë?

Është e vështirë, sepse dihet që janë shumë këngëtarë në treg dhe është një konkurrencë shumë e madhe. Por mendoj se me një mendje të shëndoshë e me një muzikë që mund t’i mbijetojë kohës bëhet e mundur çdo gjë. Unë do mundohem që gjithmonë të bëj këngë që të mund t’i rezistojnë kohës.

Jeni pothuajse në një moshë me këngëtarin Ermal Fejzullahun. Ka konkurrencë mes jush?

Unë jam një njeri që kam një shkollë muzikë dhe kam filluar shkollën në mënyrë profesionale, kështu që jam disa hapa përpara atyre që mund të më ndjejnë konkurrent.

Domethënë nuk e ndjeni rival?
Nuk e thashë këtë./gameover/webmagazina.